زحام

هاجسي واقع وفالواقع زحام
والشعر بالوقت هذا ماينام
دام راسي مأذنه تطلق شعور
الشعر مأموم و لساني إمام
المحبه شي مفهومه بعيد
غير كل اللي حسبته انسجام
مو حمامٍ لا شرق فوقه صباح
هو صباحٍ لا شرق فوقه حمام
واختلاف الراي نعمه والدليل
ماتخيّل كل وجهاتك أمام
واختلاف الراي سكين الضعوف
اسفكوا به دم من صلى وصام
والصداقة والاخوة أسويا
لو تغير فالمسمى بالكلام
والخيانه كان تنبذها اكيد
لا تعدى شي أسمه احتشام
الخيانة لو تشاهد بالعيون
يخلع الشيطان عن وجهه لثام
والحسد.. فصدور خلانك مثير
وش فرق بينه وبين الانفصام؟
الحسد للحاسد فصدره حصاة
لا تسوي من حصى صدرك ركام
والتواضع.. من سمات الأنقياء
لكن احذر تتواضع للئام
القمر وسط السما خاوى النجوم
والكبير كبير رغم الازدحام
والعزيمه سر أسرار النجاح
منّها قام الشليل بلا قوام
العزيمه ماء والدنيا حديد
فكك الدنيا.. بكثر الاصطدام
والحقيقه بيّنه لو شيصير
لو عِداك اتخشها الفين عام
الحقيقه في ظنونك لو تموت
يحيي الله الرميم من العظام