بيت وصدى

الأسبوع الماضي كان بيت الأسبوع للشاعر عبدالعزيز المحسن من حائل حول مقترح الأخ الوليد الطيار من الرياض الذي يتكلم عن الوقوف مع الأمانة في جهودها المبذولة وحملتها في مراقبة المطاعم والاستمرار في ذلك والبيت يقول :
يدنا بيد أمانة العاصمة دوم
نضرب على يد خاينين الأمانة
وقد كان صدى الشعراء:
يا ربعنا همّوا كفاية من النوم
نقضي على نفس مشت بالخيانة
يبي لنا شدّة مع اخلاص وعزوم
واللي على هالحال ما هو مكانه
ابن البلد له حق والحق مهضوم
الاجنبي جانا وحلّ بمكانه
محمد عبد العزيز الخنيفر - أشيقر
يا هل الأمانه قلت لازم وملزوم
ترى الامانه كايده يالامانه
نبي رجالن فلعمل تخلص اتقوم
المخطي المخطي يقولون عانه
حتى يشهر به وحن نلحقه لوم
عبر الجرايد قلت ينشر بيانه
سعد صنهات السهلي/الدرعية
ناس تستر على شله وقوم
تفتح محلات تجيب الاهانه
منها مطاعم اكلها صار مسموم
والباقي الله عالم في مكانه
ياهل التستر شغلكم حيل مذموم
وحسبي على الي مايصون الامانه
حمد عبدالله الوايلي/حوطة سدير
كل بنفسه يبذل الجهد ملزوم
لابد تثبت للمواطن مكانه
واللي تعاون محد يلحقه لوم
يبذل مع المسؤول صدق وامانه
واللي يقصر مع هل العرف مذموم
اوضح كلام يتهم بالخيانه
علي رشيد الرشيد
بعض المطاعم غشها قدم وليوم
كم مرة شفنا وشفنا خيانه
الاكل مكشوف على طول مسموم
هذا الوطن لابد نحفظ كيانه
ضد المخالف ناقف اليوم ملزوم
نبدي تعاون والتعاون امانه
عبد المحسن بن محمد المحيسن
يا اخواننا لاشفنا شي وبه لوم
فورا نبلغ عنه نوضح مكانه
وان كان هالغشاش مجرم وله حوم
يلقى القبض عليه اثناء الخيانة
لان الوطن مليان اجاويد بالكوم
وبالجد ان شالله ننهي العفانة
عبدالله علي الحوشاني - الرياض
اللي يشوف ملاحظة يلحقه لوم
ان كان ما بلغت تراها خيانه
منظر ملابسهم خلاقين وهدوم
لي شافها المبصر يكذب عيانه
وادهى وامر تلقى فئة خمسة نجوم
وفي داخل المطبخ يبيله صيانه
لك الاجر تراك مقبل على الصوم
رقم الطواري كاتبته الامانه
سعود عبدالعزيز الهزاع - نعام
بيت الاسبوع
حول مقترح الأخ عامر فريح العامر من جبة لموضوع بيت الاسبوع وهو عدم اهمال الابناء في العطلة الصيفية ومحاولة إلحاقهم بالنوادي الموسمية لوزارة التربية والتعليم في انحاء المملكة ارسل الشاعر حمد عبدالله الوايلي من حوطة سدير ويقول:
شبابنا وقته فراغ واجازه
وفي كل حي صار للصيف نادي
نستقبل صدى هذا البيت بثلاثة أبيات فقط تدور حول المبادرة بالتسجيل في النوادي الصيفية وعدم اهمال الابناء اثناء العطلة
مقترح لموضوع بيت الأسبوع المقبل
ارسل للصفحة الأخ شجاع حمود الهجهوج من الرياض مقترحا لموضوع بيت الاسبوع القادم وهو ضرورة الانتباه للتوصيلات الكهربائية وعدم زيادة الاحمال مما يسبب الحرائق في فصل الصيف