بيت وصدى

الاسبوع الماضي كان بيت الاسبوع عن مقترح الاخ جزاع الشريهي حول ضرورة إبعاد مصانع الجبس والاسمنت والكسارات عن ضواحي المدن حفاظا على عدم تلوث جو المدن وسلامة صحة المواطنين للشاعر حمد عبدالله الوايلي من حوطة سدير ويقول:
مصانع الاسمنت حول المدينه
مع كم كسارة غدا الجو مسموم
وقد كان صدى الشعراء:
اللي حواليها عسى الله يعينه
لا راحة بالبال ولا طاب له نوم
حول البلد ازعاج نسمع رطينه
واللي بقربه دايمن هم وهموم
يشكي على الله ثم يرفع يدينه
وابعادها مطلوب و اليوم ملزوم
محمد بن عبدالعزيز الخنيفر
حافظ على نفسك ونفسك ثمينه
ابعد مجال النفس عن ضيق وهموم
قرب المصانع للمداين ندينه
عوادمه مابين حالات واسقوم
واللي قريب منها ربك يعينه
ليته بعيده يم قارات وحزوم
عبدالمحسن بن محمد المحيسن
اشوف شين كلكم شايفينه
حنا نقول اللوم من يسمع اللوم
والحل و لله كلنا خابرينه
الحل قلت الحل يصدر ابمرسوم
سعد صنهات السهلي
راع المصانع جارك الله يعينه
ماهوب مرتاحن بقربك ولايوم
ازعاج وغبارن وهم وغبينة
مع زحمة الديرة تزيدوننا هموم
معجبكم الجو في بلدنا وزينه
تلوثونه بالدخاخين ياقوم
عبدالعزيز الصالح
إغبارها لو أنهُم دافنينِه
مشكُور قِلناله ولاهوب ملْيوم
شاف التلوِّث والمخاطِر بعينِه
من شرها المكْشوف يحظر به النوم
فهد بن عقيل الطويان . بريدة
مات الشجر والباسقات الثمينه
تلوثت والادمي صار مسقوم
ترى المزارع من ضررها حزينه
عقب النضاره ذاويه سامها سوم
حتى الحجر والرمل في كل طينه
تشكي على الله حالها دايم الدوم
علي ال زولان الفيفي
اللي معه ربوٍ عسى الله يعينه
يسهر من اسباب العوادم عن النوم
غير التلوث وحس صوت المكينة
لي شفت كسّاره تقل فوقك غيوم
ودك تبعّد خارجٍ عن المدينة
توضع بعيدة عند وديان وحزوم
سعود عبدالعزيز الهزاع
الجو مر زين ومر ياشينه
ويزيد في العله مصانع غدت كوم
ياقربها ياقربها من المدينه
مصنع وكسارات والحل معدوم
ومن فيه ضغط وربو ربي يعينه
يصبح مريض ويقضي اليوم بهموم
سلطان سعد السهلي
بيت الاسبوع
تجاوبا مع مقترح الأخ عضيب الزايد حول ضرورة توعية المتنزهين في البر بترك المكان افضل مما كان: ارسل للصفحه
الشاعر علي رشيد الرشيد من رياض الخبراء ويقول:
ياقاصدين البر خلوكم قروم
ترى النظافه للمكاشيت عنوان
نستقبل صدى هذا البيت بثلاثة أبيات فقط تدور حول هذه القضية الهامة ووجوب تحديد هذه الاشعار باستيكرات للاشعار ويفضل الإرسال عبر الإيميل rb-khozama@alriyadh.com
او على الفاكس (4871070/ 01)
مقترح لموضوع بيت الأسبوع المقبل
ارسل للصفحه الاخ وليد عبدالله السند موضوعا لبيت الاسبوع القادم وهو ظاهرة الاخطاء الطبية بالمستشفيات