اللغز

كان كاتب لغز الاسبوع الماضي الشاعر احمد بن ناصر المحرج من الرياض والذي يقول :
انا بنشدك عن بنت لها ميزة عن الباقين
جعلها ربي لبعض البشر علامة للزود
لها وقع بالانفس لين شفناها مع الحيين
وتراها واضحه باعلى العلا ماتبغي اي شهود
وقد توصل للحل شعرا:
سلام الله على احمد واثنيها على القارين
وانا رجل ٍ مع الرمعات لا غايب ولا موجود
حلول اللغز تلقاها على جبهة رجال الدين
علامه في جبين اهل التقى والزهد واهل الجود
سعدون بن مرزوق/الجبيل
هلا يا مرحبا حييت يالمحرج وجبت الزي
علامة للسجود بجبهة اللي مكثرين سجود
ذكره الله لهم سيمه وشفناها بشوف العين
عسى الله يصلح النيه ونبلغ غاية المقصود
صلاح بن عبدالله اليابس / رحيمة
الا يا مرحبا بك يا احمد المحرج تعداد الصين
واعداد من لبى وطاف وحصل المقصود
قريت اللغز واعجبني وانا حليته ببيتين
علامة واضحه بالمسلم اللي سجدته بركود
علي رشيد الرشيد - رياض الخبراء
سلام الله عليكم يا احمد المحرج خذ البيتين
وانا ابشكرك يالغالي لعله ياصل المردود
ترا النبي المصطفى سجد على مويه وطين
عساك من اللي يسجدون وساهر والعباد رقود
محمد ابودحيم - البدائع
هلا يامرحباء باللي يجيب اللغز بين وبين
يحاول يخفي رموز المعاني والهدف منشود
ترى حل اللغز بين نشوفه في رجال الدين
كسبها من تعلق فالسجودِ وافهم المقصود
مصلح بن تركي بن مرزن - الجمش
هلا باللي بنى لغزه على المعنى على التمكين
ابوناصر يصيغه منْ ذهب ما عرّضه منقود
لقيت البنت في اعلى مكان ٍ فالجباه تبين
علامه للمصلي من سجوده في رضى المعبود
مقرن بن متعب الهرف- الرياض
عرفت اللغز يالمحرج قبل ما كمل البيتين
وعرفت البنت وتسمى علامة من آثار إسجود
لها اسم ورسم من فوق الجبين وتحتها العين
كسبها من تفرد بالعبادة في رضى المعبود
غنام بن صالح البدراني
الا يامرحبا ترحيبة تافي مع الوافين
تعم الربع باخازمى اقوله والنشاما اشهود
تبي تعرف هل الطاعه سماهم بالجباه اتبين
رجالٍ يذكرون الله قيامٍٍ والعباد ارقود
سالم البشري/الجبيل
ابرمع حل لغز المحرج اللي جابه ببيتين
واحرجنا نبي حله بلا نقصٍ ولا به زود
اثر موجود بالجبهة من كثر السجود يبين
وعسانا من هل التقوى بجنة ربي المعبود
عبدالكريم الراشد التميمي - الغزالة.
هلابك يابن ناصر والبنيه في مكانن زين
تراها فوق حجان المصلي و الملامح سود
تجي بوجيه ناسن لاذن المذن مشو عجلين
ترا ذولا حمات الدين يا رجال وله جنود
سعدصنهات السهلي/ الدرعيه
رمعت اللغز بالمحرج وشف حله بعد يومين
على صفحة خزامى واضحٍ موجود
لقيته في جبين اللي يجب الله من أهل الدين
ترى السجدة علامه في جبين العود
علي آل زولان الفيفي - بيشة
تحيه لصفحة خرامى ورجالها الوافين
وكل من شارك بحل اللغز وبه يبذل المجهود
لغزك يا بن ناصر شامتن في عالي الجبين
وهني من طاع ربه با الصلاه وكبرله با السجود
عبدالعزيز العنزي / بريدة
عرفت اللغز يالمحرج قبل ما كمل البيتين
وعرفت البنت وتسمى علامة من آثار إسجود
لها اسم ورسم من فوق الجبين وتحتها العين
كسبها من تفرد بالعبادة في رضى المعبود
غنام بن صالح البدراني
هلا بك يا أحمد الناصر عدد ما كبر مصلين
بيوت الجنة العليا برحمة ربنا المعبود
وبنتك يا أحمد الناصر ترانا بوصفها دارين
تراها السجدة بالجبهة أثرها واضح موجود
سعد مويزر مشعان البدراني - الرس
توكلنا على الله وبتدينا ننظم البيتين
على صفحة خزامى لنشامى نبذل المجهود؟
وحل الغز شامه لسجود بعالي الجبين
علامه من علامات السجود لطاعت المعبود
بندر فوزان العنزي /تبوك
سلام الله عليكم يالخزامى مشرف وقارين
واخص اللي نظم لغز على قاف اين وقاف الأود
رمعت الحل اثر سجدة بجبهة ناس مصلين
وبه ناس يصلحها لعل يجيه منها فود
عزوز العلي -حائل
كما توصل للحل نثرا
عقلاء مثقال .الفويلق .صالح العبدلي
لغز الاسبوع
كتبه للصفحه الشاعر/ضمن عواد السناني من ينبع البحر ويقول
ياويش بنت لياغزت قوم جهار من النهار
اضحى صباح القوم ليل حالك بلا معركه
اسرى لها تامر عليهم امر محسوم بقرار
لكنها في حكم شيخ اسيرها له تتركه
نستقبل الحلول عبر الايميل rb-khozama@alriyadh.com او الفاكس 014871070
كما نرحب بطرح الألغاز الجيدة.