اللغز

الأسبوع الماضي كان لغز الأسبوع من طرح الشاعر عقاب سقيان العتيبي من الجمش والذي يقول:
قال الذي ينشد هل العرف ناشد
ينشد رشيد العقل لو كان راشد
عن طايع في خمس باريه طايع
تجري دموعه كلما كان ساجد
أعمى بصير وعلم الاعلام نهجه
وجيه ومعلم وفي العلم زاهد
وقد توصل للحل شعراً:
يا مرحبا باللي للأجواد ناشد
واهل الخزاما اللي لهم راي راشد
هذا القلم مذكور بكتاب ربي
والكل منه طالع بالفوايد
يزيد أحمد الطيار
اهلا هلا بعقاب والقاف راكد
ترحيبة والحل معها بشاهد
عبر الخزامى في معاني فرايد
هذا القلم يعاقب والكل عاهد
فزاع عبدالله الشمري - حائل
في محكم التنزيل مذكور يا عقاب
حله مدون في خزامى الصياهد
يا عقاب جاك الحل مثل الجواهر
من فيض شاعر و(القلم) خير شاهد
علي الزولاني - فيفا
سلام الرياض الشمم حبل واحد
وانا لصفحتها لزوم أتواجد
ذاك القلم والعلم ما عنه ناشد
واحل اللغز بسهل أو كان كايد
ماجد بن عبدالعزيز الثميري
سر يا قلم وأكتب بيوت وشواهد
تنبيك حل اللغز والرب شاهد
سجل قلم حله موضح وباين
واللي يريد العلم كافح وجاهد
صلاح بن عبدالله اليابس - رحيمة
الشكر للمعبود والخير واجد
يبعدك يا عقاب عن كل فاسد
هذا قلم يكتب على خط سيره
ما يستوي بالناس قايم وقاعد
سعد مويزر البدراني
ان كان ما خابت ظنوني لقيته
لغز الخزامى رمعته شي واحد
هذا القلم لازال عالي مكانه
من ماضي الايام حاضر وشاهد
مقرن بن متعب الهرف
هذا القلم مشهور في كل فايد
لا صار عند اللي من الناس ماجد
يجريه بالعلم والتدوين فنه
ويحويه عقل على التعليم عايد
بندر عواد الطارف - الجوف
كما توصل للحل نثراً:
فراج محمد الهواشله - وادي الدواسر. خلف عايد السحوم - بريدة. منصور تركي العتيبي
لغز الأسبوع
من طرح الشاعر صالح محمد البشري ويقول:
ويش الخوي اللي يونسك بالبيت
لا صرت بالديره وحيد خلاوي
ثالث ثلاثة وإن قصر عنك وليت
تبقى مع الطرقه وربي شقاوي
نستقبل الحلول على الإيميل
rb-khozama@alriyadh.com
أو الفاكس: 4871070
ونرحب بطرح الألغاز الجديدة