اللغز

الاسبوع الماضي كان لغز الخزامى من طرح الشاعر عبدالكريم الراشد التميمي من الغزالة والذي يقول:
ياهل الالغاز من يرمع اللغز الثمين
كار من جابه يقلط على فاله خروف
شايب عمره وصل فوق سبعين السنين
عياله العشرين واربع لهم نفس الظروف
وآخر عياله ماهو شقيق السابقين
اختلف بالاصل والفصل والاسم معروف
وقد توصل للحل من الشعراء
يا هلا يا مرحبا جبت لك لغز سمين
يالتميمي دوك حله مسطر بالحروف
العلم علم بلادي على الرايه يبين
والشهادة حدرها السيف كامل بالوصوف
صلاح بن عبدالله اليابس / رحيمة
يالتميمي حار فكري بلغزك يافطين
العلم وعياله اللي ذكرت هي الحروف
كلمة التوحيد والسيف من تحته يبين
اشهد انك حايفه وانته للطيب تحوف
محمد ابودحيم - البدايع
مرحبا بك يالتميمي عدد رمل القطين ..
ربعكم اهل الكرم نسمع القول ونشوف
حل لغزك عندنا له وقار من سنين
العلم بالمملكه حامل زين الوصوف
علي رشيد الرشيد - رياض الخبراء
لغزكم ياصاحبي طيبٍ اصله يقين
ينتمي للمملكه كلنا حوله وقوف
العلم به ميزه ماينكس للحزين
بالدواير نرفعه كل من حوله يشوف
محمد ابوطلال - الجبيل
ياتميمي حل لغزك يبيله جلستين
لكل معنا من معانيه يلزمنا الوقوف
ذا علم مملكتنا مملكة دنيا و دين
كلمت لله عاليه من فوق السيوف
سعد صنهات السهلي الدرعية
لغز الاسبوع
ارسله للصفحه الشاعر /جمعان بن حشر بن قويد من وادي الدواسر ويقول:
ويش الفتاة اللي على باب رجال
تاخذ زمان عند بابه مقيمه
تقفل عليه الباب ويشيل الاثقال
ولا يمسكه غير الفتاة العديمه
نستقبل الحلول عبر الايميل rb-khozama@alriyadh.com كما نرحب بطرح الألغاز الجيدة.