اللغز

الأسبوع الماضي كان لغز الأسبوع من طرح الشاعر مخلف سعيد الشمري من الأحساء والذي يقول:
أربع بنات بين بيضه وسوده
يمشن بطي ما بين ذولا وذولاك
نوب مع أهل البيض يثبت وجوده
ونوب مع أهل السود والعلم ينصاك
وكانت حلول الشعراء:
ياللي كتبت اللغز ما احلى وروده
ان كان تبغى الحل حنا عطيناك
ساعات اربع بين نقص وزوده
بين الشتاء والصيف ماظن يخفاك
علي رشيد الرشيد - رياض الخبراء
يا مرحبا والكون ثابت وجوده
يا الشمري استقبل الحل لا جاك
ساعات والساعات نقصه وزوده
ليل ونهار الطيب طبعك وشرواك
محمد أبو دحيم - البدايع
يابن سعيد اللغز بانت سدوده
واعرض انا حلي لمثلك وشرواك
الحل اربع فرق ساعات زوده
في ليل او صار ابنهار وحياك
محمد صالح الاطرش - رياض الخبراء
مخلف سعيد اللغز جتلك ردوده
يا سابق بالطيب صعب انتعداك
ليل الشتا يفرق عن الصيف زوده
وطول النهار بصيف ما هوب يخفاك
فهد بن عقيل الطويان - بريدة
هداج تيماء كل ضامي بردوه
بالماضي اللي راح وقته تعداك
بناتكم يا شيخ قر بروده
فرق الشتاء والصيف عندك وشرواك
عبدالمحسن بن محمد المحيسن - رياض الخبراء
التفاتة
الأسبوع الماضي أرسل للصفحة الشاعر مقرن متعب الهرف حلاً للغز الأسبوع قبل الماضي وكان من أول الحلول وسقط حله سهواً نعتذر له:
يا مرحبا واهلين قبل الكلاما
من بعدها برمع وبكتب حروفه
الاستكر ف المركبه يالكراما
دليل فحص بينات وصوفه
مقرن بن متعب الهرف - الرياض
لغز الأسبوع
للشاعر محمد صالح الاطرش رياض الخبراء ويقول:
انشدك عن بنتين في ورع صغير
وجودهن بالورع سبب له خطر
وان رحلن يرتاح من هم كبير
يلقى الامان لو زاد عمره أو كبر
نستقبل الحلول على الفاكس(4871070) أو الايميل rb-khozama@alriyadh.com كما نرحب بطرح لغز الأسبوع.