اللغز

الأسبوع الماضي كان لغز الأسبوع من طرح الشاعر محمد العريني من البدائع والذي يقول:
أنشد عن اللي ذكرتني بميعاد
فيما مضى واليوم شبه معدومه
يا زينها في وقتها جدال وعناد
واللي برك للحق زانت علومه
وقد توصلت للحل شعراً كل من:
اللغز معروف على وقف الأجداد
ما يعرفه جيلنا ما نلومه
ذكرى عن النسيان تنفع للأوعاد
عقدة اشماغك في يدك إمحزومه
علي رشيد الرشيد - رياض الخبراء
يا مرحا بك عد ما سال كل واد
ذكرني لغزك حاجتي بعد نومه
شماغك به عقده تذكرك ميعاد
بالماضي اللي صادفن ذي سلومه
صالح عبدالله الزيد - عنيزة
حيِّيت يالعريني وأنا عنك نشاد
رفقة شعر والوجه نجهل إرسومه
الحق لي عندك على روس الأشهاد
موفيت لي وعدك على دور يومه
كم عقده يعقد اشماغك والافاد
مرسولي اللي قال عاقد اكمومه
فهد بن عقيل الطويان - بريدة
يا مرحبا بك ياهلا فيك يا سناد
واللي يجي بالزين يبشر نسومه
ذكرتني يا رجل في عاد شداد
بالعقده اللي بالشماغ محزومه
سالم البشري - الجبيل
با جمل صحيفه فيه لغزاً ونشاد
حيه وحي اللي سعى في قدومه
فيما مضى عقده وتربط ولا عاد
يحتاجها عصر تلاشت قرومه
يزيد بن محمد بن أبومعطي - الدوادمي
حييت يابودحيم يوم أنت نشاد
يا مرحباً والحل تقرى أرسومه
العقده اللي في طرف غترتك زاد
هي ذكرتك بموعد لك تقومه
إبراهيم بن مهنا اليابس - ريحمة
يا للي بدعت اللغز ذكرى للأجداد
يا مرحباً حييت وأبشر بقومه
عقده وملفاها بغتّر الأجواد
تذكره في موعد الحق يومه
صلاح بن عبدالله اليابس
نعطيك علم البنت كان انت نشاد
من شان ما تكثر براسه همومه
هذي منول تنعقد ما بين الاجواد
بشماغ من صارت عليه امحكومه
ياسر محمد الدفاع - عنيزة
صفحة خزامى عشقها بناظري زاد
عن باقي الصفحات ترفع اسهومه
كان انت يا بودحيم للغز نشاد
باسفل شماغي عقدة ومحزومه
علي غنام الغنام - رياض الخبرا
لغز الأسبوع
كتبه: سويد جمعان بن قويد الدوسري من وادي الدواسر ويقول:
أنشدك عن فاطر تركب على الحاشي
والهرش يركب على الفاطر وتجريبه
الحاشي مكتفاً والعود منحاشي
والفاطر اللي تجينا به وتعقيبه
نستقبل الحلول على فاكس 4871070 خزامى الصحارى - لغز الأسبوع.