عساه فالجنة

رثاء في الشيخ تركي بن نايف بن حميد - رحمه الله -
يالله ياللي من ترجاك ما خاب
يا واحد تعطي العطايا الجزالي
تفرج لقلبٍ من عنا الوقت منصاب
يوم أن بعض الناس داله وسالي
علمٍ لفانا اودع الفكر مرتاب
قعدت اصفق باليمين الشمالي
البارحه دمعي على الخد سكاب
واصيح صيحة من دخل به اهبالي
مرحوم يا شيخٍ لنا درع وحجاب
اقفن بتركي مظلمات الليالي
تركي ولد نايف وفكاك الانشاب
معرب الجدين عمٍ وخالي
عقيد قومٍ لاوقف شال الاصعاب
يفتل وينقض مبهمات الحبالي
ياستر من تزها جديدات الألقاب
لاثار عج الخيل عند التوالي
للطيب كسابٍ وللمدح كساب
انا اشهد أنه هو حميد الخصالي
متسلسلٍ من روس زاكين الانساب
نايف حليف الجود ذرب الفعالي
يبكونه الربع القريب والاجناب
والمجلس اللي مدهلٍ للرجالي
ويبكي عليه الناس شيبٍ وشياب
ويمجدونه كل ما جاء مجالي
دنياك هذي كلها هم واتعاب
محدٍ عرف فيها طريق التسالي
يالله انا طالبك يارب الارباب
تغفر ذنوبه يا عزيز الجلالي
عساه فالجنة مع العرب الأتراب
ويعل من حوض النبي الزلالي
سعود بن بدر بن شبيب المقاطي