مرثية في هزاع بن ملوح بن شري

شيخ بيومه ذارف الدمع مسموح
يبكونه الصافين في ساعة وداع
في شلة الجثمان بموادع الروح
ويبكيه باب ما انزلج منه مصراع
مشرّع في ملتقى الضيف مفتوح
ويبكونه الهشّال لا جوله أتباع
ويبكيه محتاجٍ ترجّاه مشفوح
ويبكيه من هو يرمي الصوت مرتاع
يصيح يا هزاع في عون مطروح
ويبكونه الخفرات زينات الاقناع
فعله يجوز عن وطاريه مصلوح
يا جعل قبره روض خلد ومرباع
ومن العذاب يرحمه الله مبيوح
شيخ لربعه استشاروه مطواع
وعيونهم لا شَوْشَوْ ابو ملوح
راعي الرها وابا الوفا ذرب الاطباع
صميدعين مع الزحازيح ممدوح
ابن شري هزاع يطرا وينذاع
مع الرجال وغرّد الركب بالبوح
عسى محمد له مع الحشر شفاع
مع الأنبياء من وقت عيسى إلى نوح
الله يعوضه جنة الخلد للقاع
واللي فجعنا قد كتب له على اللوح
ويعوضنا في غيبته كل تباع
ملوح ابا الوقفات واخوان ملوح
سعود مما لاعكم صرت ملتاع
والعذر في غيابي عسى أيامك فروح
واقبل تعازي من درى تو من ساع
والا ترى جروح النشامى لي جروح
مانع بن شلحاط