اللغز

الأسبوع الماضي كان لغز الأسبوع من طرح الشاعر سالم البشري من الجبيل والذي يقوله:
انشد عن اللي ينطح الشيل ويشيل
تلقاه يقدم بالوجبه الفليحه
يشتال شيله حشمة للرجاجيل
والعود الازرق يفرق بزين ريحه
ومع اعتذارنا لمن لم يوفقه بالحل الصحيح نشيد بمن استطاع حل اللغز شعراً:
اهلا.. اهلا.. واعداد وبل الهماليل
واعداد نبت بالفجوج الفسيحه
ترى الشحم معروف بالبل والحيل
واشخم يا سالم وصيه صريحه
عبدالمحسن بن محمد المحيسن - رياض الخبراء
يالله بنو يتبعه وابل السيل
يسقي ديار المسلمين الفسيحه
الحل خشمن في وجيه الرجاجيل
محشوم عند اهل الوجيه الفليحه
أحمد ناصر المحرج - الرياض
قبل ماحل اللغز مشتاق بالحيل
وفي حله يا سالم تجود القريحه
وحله على هالخشم قول المشاكيل
وهو الذي يفرق بالاطياب ريحه
محمد صالح الاطرش - رياض الخبراء
يالبشري ابشر جالك العلم بجبيل
عبر الخزامى اللي تشد القريحه
من فوق خشمي تنهي القال والقيل
يكسب بها الرجال طيب ومديحه
فهد بن عقيل الطويان - بريدة
يا دحيم شب النار وادن المعاميل
واضبط لنا فنجال ينعشك ريحه
يا دحيم انا بوصيك لا تترك سهيل
قله على خشمي وصاتك مريحه
المرسل: أبو دحيم - البدائع
لغز الأسبوع
كتبه عبدالمحسن بن محمد المحيسن من رياض الخبراء ويقول:
يا ويش رجل ثبتوه النشاما
في ماقع باقصى يمينك تشوفه
والعمر عام واحد بالتماما
وعياله العشره وواحد تحوفه
** نستقبل الحلول على الفاكس 4871070) أو الايميل rb-khozama@alriyadh.com حتى مساء الاثنين القادم ونرحب بطرح لغز الأسبوع.