بيت وصدى

بيت الأسبوع الماضي كان من طرح الشاعر سميحان فهد السويدي والذي يتكلم عن أخطار السيول والذي يقول:
يا صاحب العايلة للسيل غدر كبير
احذر تراها بلحظة تقلب أفراحها
وكان صدى الشعراء كما هو متوقع جميل ورائع:
صدقت وأكبر غلط من لا يقوس الغدير
يا كثر ناس تعوّد تنقل جراحها
بطون الشعاب أحذره وامسك بيد الصغير
تابع فلذات كبدك وين مسراحها
سعود عبدالعزيز الهزاع - نعام
يا كاشت للخلا خلك فطين وحذير
عينك على العايله لا تفقد ارواحها
السيل لا تقربه لو كان مثل الغدير
لا تآخذك فرحتك وتقول سباحها
سعود بن سعد الحافي - الرياض
لا لا توهق كبير إن كنت وإلا صغير
السيل ما تنطحه قوه وسباحها
حزن المآسي من أسباب التهور خطير
جرحه ترى أعظم من اللي مات بسلاحها
فهد بن عقيل الطويان - بريدة
امانتك لا تضيعها بدرب خطير
تدفها للخطر وتصير ذباحها
يا كثرهم يا طويل العمر وسط الغدير
تهاونوا فالسيول وضاعت أرواحها
منير متروك المطيري - الجبيل الصناعية
في طلعة البر فرحه خص شوف الغدير
لا رحت تصبح قرير العين مرتاحها
احذر تجي وادي تنشب وتعجز تسير
ثم تصيح الحريم ويكثر نياحها
ابراهيم محمد العبدالكريم - الرياض
لا لا يطمك ترى سيل خطير غزير
كم "سيول" بحرها راح سباحها
فكر وفكر وخذ حكمة وخلك بصير
تجني لك افراح ثم تجني انجاحها
سعود مناحي الهبداني - الرياض
الناس لا شافت سيول نوت بالمسير
ومع طلة السيل تبدي حلو مسراحها
يا ناس هذا وربي لا حشى ما يصير
من دون تفكير جازفتوا بأرواحها
محمد عبدالعزيز الخنيفر - أشيقر
السيل طيب ولكنه وربي خطير
خلك بعيد عن الشعبان واشباحها
السيل لا يحجرك وتصير مثل الاسير
ثم تنقلب كل فرحاتك على اتراحها
سلمان عبدالعزيز المعيلي - الرياض
بيت الأسبوع
تجاوباً مع اقتراح الأخ عبيد مونس من الرياض والذي يتحدث عن عدم صدق بعض حملات الحج وعدم الالتزام من بعضها بالعقد كتب الشاعر فهد عقيل الطويان من بريدة هذا البيت:
يا منظم للبيت حملات للحج
ما تكتبه بإعلان لازم توفيه
نستقبل صدى هذا البيت بثلاثة أبيات تدور حول هذا الموضوع على الفاكس 4871070أو الايميل khozama@alriyadh.com
اقتراح لموضوع بيت الأسبوع القادم
بعث للصفحة الأخ عبدالله السند من الرياض اقتراحاً لموضوع بيت الأسبوع القادم وهو مزاينات الابل وظهور المباهاة والبهرجة التي لا تنم عن وعي بأهمية الموروث.