رسائل محبة لصالح الشهري

كما لم يكتب من قبل، نظم الشاعر الغنائي محمد القرني ثلاث قصائد عبّرت عن مشاعره ومشاعر كل محبي الملحن الكبير صالح الشهري الذي يرقد للتشافي في مستشفى الحرس الوطني بالرياض، وربما من المقرر أن يتم تنفيذ هذه القصائد تمهيداً لغنائها من أحد الفنانين أو أكثر، فيما أهدى الشاعر (الجزيرة) هذه الأبيات لنشرها:
صالح صباح الخير
صالح صباح الخير وشلونك اليوم..
طمن فؤاد إللي معك ساهر الليل ..
فيني الألم مثلك توالى مع اهموم..
والله.. ورب البيت ما عاد به حيل..
* * *
جرحي وجرحك بالحياة غير مفهوم..
تعطي وتجني في الهوى كايد الويل..
تعطي الهوى يا صاحبي يرجع اسهوم..
وتشرب جروح الناس مع دلة الهيل..
* * *
تضحك ولو قلبك من الناس مهموم..
وانت اللي مد الحب سيل ورى سيل..
أحس بك دايم بها الارض مظلوم..
مثلي.. ولكن ما تحب التهاويل..
* * *
انسى الشقا ثم اعتبرها صدى احلوم..
يا صاحبي تتعب من القال والقيل..
صبرك بصبري وكل واحد له اعلوم..
يجمعنا هذا الحب لو طول الليل..
ياخوي لا باس
خلك قوي .. وصالح الروح بالروح..
وخلك مع ربك ولا تهمك الناس..
إعشق حياتك واطعن الجرح بجروح..
هل من مبارز.. يابعد كل إحساس..
* * *
عط هالمرض ضحكة وشوي من بوح..
عطه ابتسامة يصير يا خوي وناس..
علمه كم تبني وكم عندك اصروح..
بنفسه يجي ويقول يا خوي لا باس..
يا صالح الاشواق
نحتاج همسك.. ضحكتك كل مافيك..
نحتاج يا صالح تخفف علينا..
حنا اللي نتعب لو قست بك خوافيك..
يا ليت يا صالح .. يكون ابيدينا..
نزرع في روحك روح تاخذ وتعطيك..
ونبدل أحزانك مثل ما خذينا..
يا مسعد الافراح ما حد يوصيك..
إفرح ترانا منك حنا إغتنينا..
* * *
ياملهم الشاعر.. وحسه يناديك..
ياملهم الفنان صوته يجينا..
انت اللي منا دوم حنا حواليك..
معنا ودايم انت منا وفينا..
يا صالح الاشواق ربي يخليك..
أهزم حزونك قوم اشرق علينا..