اللغز

الأسبوع الماضي كان لغز الأسبوع من طرح الشاعر علي رشيد الرشيد من رياض الخبراء والذي يقول:
لقيتها بأول نجوم السما تلوح
وتشوفها لو تنتقل لآخر الصين
متلازمه مع بنتها قول مشروح
يازينها لا شفتها صدق بالعين
وقد توصل للحل شعراً:
من يوم شفت اللغز للحل مطروح
ارسلت لي رمعه قبل يوم الاثنين
الحل حرف النون مكتوب باللوح
واللغز وارد ما يجي فيه حلين
فيصل وليد ناصر الجابر - عنيزة
لغز الرشيد اليوم سهل وبه وضوح
واظن من جابه تعدا الملايين
(للنون) في عين الفتى لمعه وضوح
والله يحفظ العين من راعي العين
ماجد عبدالعزيز الثميري - المجمعة
قريت انا لغز جديد مطروح
النون حرف النون والظاهر يبين
مربوط باخوانه ولا يقدر را يروح
هذا جواب اللغز يا عارفه زين
عبدالله الصالح الاطرش - الرس
عسى يلازمك السعد وين ما تروح
ياللي نظمت اللغز محكم ببيتين
قصدت حرف النون من دون مشروح
حرف مع اخوانه بلاشك غالين
صالح بن عبدالله التميمي- الرس
يا مرحبا ترحيب واللغز مطروح
في صفحة خزامى على ربع غالين
والحل حرف النون والون في نوح
وصلوا على محمد صلاة المصلين
سالم البشري - الجبيل
شفت الجريده داخله لغز مطروح
بعد قريت اللغز فكرت بالصين
آخر حروفه نون واللغز مشروح
الحل حرف النون من دون تخمين
محمد ابودحيم - البدائع
حي الله اللي جاب له لغز بوضوح
لغز لمع بالنون من غير تنوين
حرف بدت به سورة ياهل اللوح
لوح شفى لناس بالعلم والدين
سعد الحماد - روضة سدير
(النون) في سلمان في سند في نوح
ياعلي هذا الحل خذ حلي ذا لحين
وكانه خطأ تراك محشوم ومسموح
انا حذفت يسار والصيدة يمين
محمد عبدالعزيز الحجيلان - المجمعة
مثلك لقيته ياعلي تجي وتروح
لصوت منهو فاقده قبل عامين
مبداه حرف النون سبب لي جروح
والحل يابن رشيد تالي العين
مهند علي البليهد - القصيم
لو كان قلبي يا صديقي به جروح
ماني من اللي يقضي الدين بالدين
خليت قلبي لأريش العين مفتوح
وال (ن) حل اللغز عند البدارين
سعد مويزر مشعان البدراني - الرس
لقيتها مبداي بالاسم بوضوح
ولاحد ذكرها يسار وتشاف بيمين
هذا هو المرماع واللغز مطروح
مره يجي سنه وثنتين بسنين
نشمي بن سعود الحربي - القصيم
لقيتها بأول نسيم الهوى تفوح
وتشوفها بتلى عيون الحساء تبين
النون والنقطة يجي العلم مشروح
واضح وضوح ثابتن بالبراهين
صلاح بن عبدالله اليابس - رحيمة
اللغز يابن ارشيد وارد ومطروح
به لفه وانشدك انا جبته امنين
تشبه اهلال وسطها نجم ايلوح
الحل حرف النون واضن جبتها زين
عبدالله الرفيعي - البكيرية
يا صاحبي الحل ما يبي له شروح
حله بسيط ولا اختلف فيه اثنين
البنت هي نقط النون ما تروح
بأول نجوم السما وبآخر الصين
ياسر حمود السناني الجهني - الخرج
رشيد جاك الحل واللغز مطروح
ابرمعة ابرمعة فظخ بالعين
اسمح لنا اسمح لنا قل مسموح
نقطة بطن النون في آخر الكون
عبدالله بن عبدالرحمن عمر اللاحم - الشماسية
حييت يابورشيد والبال مشروح
اعداد بنت العشب وايضا البساتين
واللغز حله يفرح النفس والروح
تراه حرف النون ما فيه تخمين
فالح بن غازي الحربي - رياض الخبراء
يامرحبا باللي بنى لغز مطروح
وسط الخزامى مرسل للفهيمين
حله بحرف النون والدرب ممسوح
سجل جواب اللغز بالهون واللين
عبدالمحسن محمد المحيسن - رياض الخبراء
لغز الأسبوع
كتبه محمد عبدالرحمن ابونيان من السر ويقول:
من السما ومن البحر خذ وصوفه
مشروب لكن دون طاسه ولاكاس
إن شربه الرجال محد يشوفه
وإن كان شربته المره بان للناس