اللغز

الأسبوع الماضي كان لغز الأسبوع من طرح الشاعر صلاح اليابس من رحيمة والذي يقول:
انشدك عن بنت تسوى لجل عود
عليه تاقف وإن تصاغت بلعها
تركب على بطنه وهي تروح وتعود
والا بغت ديره قلعها قلعها
ياللي طلبت الحل تلقاه في هود
هذي سفينه واشكر اللي صنعها
جاكم جواب اللغز بالفكس مردود
ياصل خزامى عاش من هو طبعها
محمد ابو دحيم - البدائع
يبو مهنا مرحبا يافتي الجود
اعداد رمل البيد واللي قطعها
واللغز حله بالبحر صار موجود
سفينة ربي على الماء رفعها
علي رشيد الرشيد - رياض الخبراء
سلام يا صالح عساك سالم زود
والحل رمعة من لاقاها رمعها
هذي السفينة والبحر قادها قود
لحل البحر هو شفها هو ولعها
عبدالله بن عبدالرحمن عمر اللاحم - الشماسية
شكراً على لغزك يابن يابس ومحمود
وكل على حله قام وولعها
على البحر دايم من السفن موجود
وان مليت بالليل زاد بصلعها
هذال عبدالله آل نيف - الرياض
الله امر نوح بصنعه من العود
وفي طاعه الله قام نوح وصنعها
ثم استوت باللي عليها على الجود
سبحان من بامره حملها ورفعها
محمد عبدالله الدوسري - الرياض
يا مرحبا ترحيبه تطلب الزود
ترقا سنود وتعجب اللي سمعها
يابو مهنا وارد اللغز ما يكود
سفينة تجري على الله سنعها
سالم البشري - الجبيل
يا مرحبا تكفي عن النقص والزود
باصحابنا واللي تزايد ولعها
واللغز حله ياهل الطيب والجود
سفينة والموج قالو شلعها
سعدون الشمري - الجبيل
للغز فتاله وللحل معهود
ومتابعه ناس تزايد ولعها
وحله (سفينه) في البحر تمشي بركود
والريح في الماضي هو اللي دفعها
محمد عبدالعزيز الحجيلان - المجمعة
الحل معنا ما يبي كتب وشهود
في صفحة اخزامى وعادي يدعها
سفينة تصنع من النبت والعود
موج يطمنها وموج رفعها
فالح غازي الحربي - رياض الخبراء
يا مرحبا واللغز ما فيه منقود
من شاعر زين المعاني بدعها
هذي سفينة بين الامواج والنود
موج يباريها وموج رفعها
صالح عبدالعزيز السويح - روضة سدير
لغز الاسبوع
كتبه علي رشيد الرشيد من رياض الخبرا ويقول:
لقيتها باول نجوم السما تلوح
وتشوفها لو تنقل لآخر الصين
متلازمه مع بنتها قول مشروح
يازينها لا شفتها صدق بالعين
نستقبل الحلول على الفاكس 4871070أو الايميل khozama@alriyadh.com خزامى الصحاري زاوية لغز الاسبوع.