تبرعوا بالدم يا اللي بكم دم يمكن يجي لك يوم تحتاج منه

بيت الاسبوع السابق كتبه للصفحة الشاعر : حاتم بن عبدالله الغريري من الرياض في الحث على التبرع بالدم ويقول :
تبرعوا بالدم يا اللي بكم دم
يمكن يجي لك يوم تحتاج منه
وهذا صدى البيت من الشعراء :
بادر تبرع ياعزيزي ولاتندم
ابواب التبرع خير ولها سنه
لاتنتظر وعجل لها واقدم
وفي صحتك حاول ولنه
فيه الفوايد ومنك مانعدم
يفيد غيرك وابشر دعوة منه
الوعي مطلب من الكل مايهدم
اسأل وتلقى جواب يبري الظنه
حمد عبدالله الوايلي - حوطة سدير
بيت جذبني قلت اشارك واسلم
على الرجال العصر في يوم سنه
واللي قبل عانا من النقص بالدم
لو ينشد جاب التفاصيل عنه
وايضا يعرف بقيمة الدم وأسهم
حسب اقتداره ياولد دون منه
عبطان السويدي - حايل
يعيش رجل للوطن دوم مهتم
ورايك جميل فيه نكهه وبنه
الدم هو ساس الحياة المنظم
واللي تبرع فالمجازاة جنه
واللي به احييى نفس ماظن يندم
كنه قد احيا الناس يالربع كنه
خالد المرشود - الرياض
لا صِرْت قادر في تِبرعك بالدم
فِيه الحساني مِع تباشير جنه
وما تبذله للخير ياخوي او عم
تَلْقَاه مِع غيرك ليا احتجت مِنِّه
وِن كان ناداك الوطن قول له سم
وجميع ما تملكه لا تَذخره عَنِّه
سعود عايش الحربي - جده
أنا اشهد ان المدح يفرق عن الذم
تبرعوا ياهل الكرم دون منه
ترا التبرع فيه خير وهو جم
لا راح دمك يم مريض تمنه
اللي تبرع ياعرب مايبي كم
ابذل دمك عن فعل الخير لا تونه
صالح بن إبراهيم السنيدي -الحرييق
بيت الاسبوع
كتبه لصفحة خزامى الصحارى الشاعر حمد عبدالله الوايلي ويقول :
ياليت بعض العرب يحسن له الجيره
في جاره اللي توذا من غرابيله
نستقبل صدى البيت المطروح خلال ثلاثة ايام من نشر البيت المطروح
على إيميل الصفحة:
rb-khozama@alriyadh.com