اللغز وافي والمعاني جزالي حله ظفيرة بين الأشخاص تذكر

كتب لغز الأسبوع الماضي الشاعر عيسى الشلاحي من الرياض والذي يقول:
ياويش بنت استقبلت للرجالي
وتودع رجال مع الباب الاخر
حروفها خمسة بليا جدالي
معروفة عند اكثر الحضر والبر
ولها سمي علاقته بالجمالي
عند البنات المترفه في زمن مر
اول وثاني حرف جمََع وشالي
واربع حروف الاوله حلف واكثر
من رمع اللغز رمعة صحيحة:
سلام يا عيسى عداد الرمالي
واثني سلامي للخزامى وافاخر
واللغز وافي والمعاني جزالي
حله ظفيرة بين الأشخاص تذكر
علي الرشيد - رياض الخبراء
اللغز يا عيسى حسب شوف بالي
ظِفِيرَة الكهرب وسط كِل موتر
واللغز سهلٍ صعب يا إبن خالي
يقوله اللي له بالالغاز يخبر
ويالله ياعالم بكلات الاحوالي
تِسقي جميع ديارِنا والله اكبر
سعود عائش الحربي - جدة
أنبيك ياعيسى جواب السؤالي
وأنت معروف بالجزيلات تذكر
هذي ظفيرة ياصعيب المنالي
يقولها العجيمي وبك دوم يفخر
إبراهيم العجيمي - شوفان
يالله ياعلام في كل حالي
ياوحد يعلم هل البحر والبر
واللغز حليته يليا جدالي
ضفيرة متشربكة لكن احذر
خالد إبراهيم المرشود - الرياض
اللغز صعب وفيه شي جمالي
محبوك حبك محير زيد وعمر
ظفيرة فيها الحلا والدلالي
وظفيرة السيارة تذوب بالحر
علي الجدي - عريجا حايل
دوك الجواب اللي خطر لي ببالي
ظفيرة الموتر وياعيسى ابشر
وظفيرة البنت بعصور خوالي
يزيدها جمال شكل ومظهر
رجا بن عادي الرمال - الرياض
لغز الأسبوع
كتبه للصفحة الشاعر إبراهيم العجيمي شوفان ويقول:
وين أنت ياللي للحجاوي تنادي
لاشك عندي لغز ودي بحله
ياويش رجل بالوصايف قيادي
أربع حروفٍ مالقو فيه خِله
تلقاه واقف والسوالف تمادي
يفطن لها ذيبان من دون ذَله
ماهوب متزوج ورجلٍ حيادي
يخاف منه البعض لو فيه شله
ينسب لرجلٍ من ثلاثه وكادي
حروف من بين الأماكن تدله
نستقبل الحلول خلال «ثلاثة أيام»
من نشر اللغز على إيميل الصفحة:
rb-khozama@alriyadh.com