الأمطار حياة أهل البادية والأمصار

الأمطار غيث الديار برحمة الله، ينتظرها المزارع والراعي ومن غدا وراح، فالماء حياة وعمران وبدونه تهجر الأماكن وتقفر.
وغيث القلوب ذكر الله وتوحيده، والدعاء والإخلاص له سبحانه، والغيث من الله للأرض المطر النافع ينبت الزرع ويدر الضرع وتخضر الروضات والفياض، وتكتسي بالنبات فيبتهج أهل الزرع وصاحب الحلال ومربو الأغنام والإبل، وتعم الفرحة والسرور الحواضر والبوادي، وتقرأ في الوجوه علامات البهجة.
ومع بداية موسم الأمطار تقرأ في الوجوه مشاعر السعادة، وترتسم عليها علامات الاستبشار، تجدها مرسومة بادية على تلك الوجوه التي بالأمس تستسقي وتدعو الله أن يرحم البلاد والعباد.
ماء المطر في بلادنا ذات الطبيعة الصحراوية أساس الحياة، فالكل متعطش مترقب لنزوله.
هذا الاستبشار والفرح والدعوات يعبر عنها الناس وبالأخص الشعراء في أبيات وقصائد تعلن رجاءها في الله والحاجة إليه، وما تجوال الناس في البراري بعد المطر إلا تعبير عن السعادة..
يقول الشاعر بدر عواد الحويفي:
لا شفت لي نوٍ بروقه ترفي
نويت اجهز موتري للتكاليف
القيظ كله جالسٍ ومتعفي
وبرد المكيف نشف الدم تنشيف
متى سموم القيظ عنا تقفي
وسهيل قبل يعمد الفجر قد شيف
والنار يصلح شبها للتدفي
والبرد نوجس من نسيمه هفاهيف
ويقول الشاعر عبدالله بن عون:
يا سعود بشرني عسى نجد ممطور
عقب الجفاف اللي يثور عجاجه
يا حلوها لو قلت لي يا أبو منصور
ما به محل ما تملت هباجه
ويقول الشاعر فهد إبراهيم المفرج التميمي:
يا الصيف في نجد مالك عند اهلها شفيع
زعلت عليك النخيل وجفّت آبارها
الله يجيب المطر والله يجيب الربيع
والمزنة اللي تقص وترهي امطارها
والله علينا لاجينا واجتمعنا جميع
في روضةٍ يلعب الذعذاع بازهارها
والله على الشايب ان سولف وصدره وسيع
سوالفه زينة الجلسة وحضارها
ويقول الشاعر الهاب بدر المطيري:
يا الله بديم ٍياخذ اسبوع ما راح
همّال من جدة إلى قصر دسمان
ما ينشد النشاد وين المطر طاح
من الشمال يعم لا حد نجران
ضافي سحابه ديم ما بارقه لاح
ماله رعود تنسمع غير هتان
ويقول الشاعر مهنا السعدي الأكلبي:
حاول تخلي الناس لاحل طرياك
بالخير لاجت سيرتك يذكرونك
واذكر مزايا الناس تذكر مزاياك
وخلك عن الهفوات عامي عيونك
وان جيت خل الكل يفرح بلقياك
محبوب عند الناس ويقدرونك
وفي غيبتك خل الجميع يتحراك
مثل المطر كل البشر يحترونك
ويقول الشاعر فلاح القرقاح:
يا وجودي وجد من شاب وحموله ثقال
وانطوى ياسه من إنجاب قبلين الوجيه
من بعد ما كان منصى طحاطيح الرجال
صار من مرَّه تعداه ما سلّم عليه
ما يوسع صدري إلا نسانيس الشمال
في مكان غير وبل المطر محدٍ يجيه
مابعد وطيوا نواميه رعيان الحلال
وماه ما يفطن له الطير لين يطيح فيه
ويقول الشارع عبدالله المفضلي الشمري:
مد النظر في صحصح يفرح الجان
وصفة علاج اللي تزايد شطونه
سقوى سقى الله لأهمل الوبل هتّان
صوت المطر قامت تشكّل فنونه
تطغى ترانيمه على عذب الألحان
تنزل على روس الروابي مزونه
فضل من المعبود يعطيه بإحسان
للمستغيث اللي يبوسً شنونه
ويقول الشاعر رجا عوض العازمي:
وبل السحايب لا تساقط على القاع
صوته وريحه يا عرب ينعش الروح
يجلي همومي كل ما هب ذعذاع
مع كثرة التسبيح والبال مشروح
ياما حلا والبرق بالغيم شعشاع
والطير غرد بالفرح عالي الدوح
لك الشكر يا رب والقلب منصاع
ما غيرك اللي عالمً خافي البوح
يقول الشاعر تركي العريدي:
البرق لا شفته بكبد السحابة
كنه تغسل القلب من كل ما فيه
اثر المطر ما هوب يسقي ترابه
يسقي جريح القلب حتى يداويه
ويقول الشاعر سعود عايد العلوي الحربي:
يازين صوت المطر يا ناس
يشعرك في منتهى الراحة
تبعد عن الهم والهوجاس
ونفسك بها الجو مرتاحة
تحس في رايق الاحساس
وقلبك تزايد به أفراحه
ويعدل الخاطر المحتاس
ريح المطر يشفي جراحه
ويقول الشاعر شريف العضياني:
جعل السحاب اللي مزونه هماليل
اللي من المنشأ تقادح بروقه
يسوقه الغربي على نجد ويسيل
لين النفل والربل يحيي عروقه.
يا ما حلا والبرق بالغيم شعشاع
عبدالله بن عون
شريف العضياني
مهنا السعدي الأكلبي
فلاح القرقاح
بدر عواد الحويفي
ناصر الحميضي