حلول اللغز

نشرنا الاسبوع الماضي لغزا كتبه الشاعر حمد الحربي يقول فيه:
يا ويش رجل كان للناس جمّاع
وهو يتعب الطرقي وييبس شنونه
وتالي زمانه سلمه المعتبر ضاع
وقاموا الى حل,, الوطن يتركونه
وجاءت الحلول الصحيحة كما يلي:
يا اللي فتلت اللغز وابدعته ابداع
اهل المعاني بالشعر ينقضونه
على جواب اللغز ما أنا بملتاع
الصيف حله ليتكم تنشرونه
محمد بن سعد بن غشام آل جناح
القويعية
***
يا مل قلب للهواجيس مرباع
لاحل ذكر البدو زادت اشطونه
القيظ يجمعهم رغم شح الأوضاع
ستين ليل عدهم يقطنونه
فهيد جمعان البقمي
الاحساء
***
يا مرحبا حييت يا طيب الباع
يالشاعر اللي طيباتن لحونه
كل حسب عرفه يبي يجيب مرماع
والحل مقطان نقافت أحتونه
سفر مشبب الشطيطي
العمار
***
لا صرت بالصمان مسكنك بشراع
في موقعن ما كل ناس يجونه
عزي لحالك لا عك القيظ لواع
القيظ هو الغيظ لا تامنونه
عبدالله مهنا السهلي
الرويضة بالعرض
***
يا اللي طرحت اللغز جيتك بمرماع
أما الهدف صبناه والا بدونه
القيظ خلا العد يردونه أتباع
قبل الرفاهة والبنا يعرفونه
سفر مشبب العوفي
القصيم
***
أهل الحلال مسنعينه بالاسناع
لو عندهم رعيانهم يتبعونه
مع الحلال من اين ما زانت القاع
والماء بعز القيظ له يقطنونه
وتغيرت هالحين راعي ومرياع
وايت لها عند العلف يوقفونه
محمد علي السالمي
رفحاء
***
الصيف حل وراعي الفكر ينصاع
لأهل النصايح يومهم ينصحونه
يااللي مرتب للسفر كل الأوضاع
ودك لخارج مملكتنا الحنونه
احفظ لدينك وانتبه لأهل الأطماع
واحذر جوازك لا يتعرض لخونه
نايف محمد الأسيد
القريات
***
حي الله اللي عنده الصعب مطواع
الشاعر اللي كلكم تعرفونه
جعلك بعد من جابها انصاف وارباع
ابطيت في لغزك وهم يحترونه
والصيف يا وجه السعد منه ملتاع
يضيق صدري منه لا تذكرونه
الأيمن
الزلفي
***
حنا نعرف المد من وزنة الصاع
واللغز نكشف ولو بعد يدفنونه
كم واحد بالقيظ يا صاحبي ضاع
ياالله عسى اللي دوروا ياجدونه
شوق عبدالله السهلي
الرويضة بالعرض
***
يا اللي نويت تصافح اكفوف الابداع
اقلط وهمك سكر الباب دونه
أهل العدل والراي قالوا بالاجماع
الشكر للي جهدهم يبذلونه
على التراث رجال والبرق لماع
والصيف مقبل والمطرفي مزونه
محمد عبدالكريم
الزلفي
***
بعض العرب,, بالصيف يا ناس مطواع
الناس بميزات السفر يوهمونه
وخلا الوطن والأمن والعز وانصاع
وسافر الناس لاجل ماله يبونه
اما يجي يشكي من أمراض وأوجاع
والا يجي يبلش يسرد ديونه
ليته يصيّف بالوطن طاهر القاع
والا بمكه والحرم يذكرونه
عطا الله بن سليمان العطا الله
الزلفي
***
هات القلم يامبرمه بين الأصباع
عندي جواب اللغز للي يبونه
عبر التراث اللي بها الفن وابداع
حمد نشد حياه ماله مهونه
الصيف وقت فات للناس جماع
يوم القطين وعدها ياردونه
واليوم كل صار بالصيف فزاع
كن السفر مفروض لومايبونه
فهد بن عقيل الطويان
بريدة
***
أنا لبعض الناس تراي مطواع
لا قال شارك قلت مالك مهونه
لاشك نبي اللي ليا كال بالصاع
لا ينقص المكيال ويغر بلونه
واللغز ماله عندنا غير مرماع
راح الشتاء والصيف هذي احتونه
ناصر المسيميري
***
سلام للي ولَّف اللغز بابداع
من واحد بالحل كثرت اظنونه
كم واحد من سبة الصيف ملتاع
سافر حبيبه للمصايف ابدونه
منصور عبدالله المجيدل
الرس
***
سلام ما وبل على مسقطه ماع
وبل تحدر يوضي البرق دونه
حمد نشر لغز عليه الخبر ذاع
لغز عليه القيض طبق اجفونه
نافع الحربي
الرياض
***
ابو حمد واقف لها وين هزاع
قراء الجزيرة جهدكم يشكرونه
الصفحة اللي نورها بالسماء شاع
بالصيف والا بالشتاء تنظرونه
الزلفاوي
الزلفي
***
الصيف حل,, وحان تصحيح الأوضاع
يا هل الوفا عسى الندا تسمعونه
دعوة صريحة ما بها غش وخداع
وسط الوطن مصيفكم تقصرونه
اديارنا فيها الطبيعة والامتاع
غير الأمان اللي بها تعرفونه
فهد الجروان
الزلفي
***
أنا أشهد إن اللغز وافي وله باع
لاشك شعار الفكر يعرفونه
سبحان رب مدبر كل الأوضاع
الخالق الوالي علينا منونه
الصيف منوة عاشق دوم ملتاع
أهل الهوى باشعارهم يذكرونه
مشاري خالد الدعجاني
شقراء
***
اللغز لا منه ظهر فيه الابداع
يعجب ترى القراء ومن يعشقونه
وحمد نوقع له ونثبت بالاجماع
انه حبك للغز واظهر فنونه
الصيف حله جبت أنا الحل في ساع
عسى هل التراث لي ينشرونه
صالح عبدالله الزرير التميمي
الرس
***
يا زين مقطانك بعد كل مرباع
لا كنّت الكنة ويبست غصونه
القيظ هو القيظ يضحك وخداع
هذا العدو بعض العرب يجهلونه
سعد صنهات السهلي
الدرعية
***
يا مرحبا ترحيبة ما بها أطماع
ببو الحميدي يوم يبرع فنونه
أنا أشهد انه شاعر بكل الاوضاع
لغزه يخص الصيف شكله ولونه
الصيف كم دوخ مسافر وزراع
وراعي حلال راح يتبع ضعونه
محمد بن حمد البدر
الزلفي
***
باقصى شمال المملكة هب ذعذاع
عذب البراد اللي هله يعشقونه
عشقا فرض نفسه عليهم بالاجماع
لا حل فصل الصيف يستانسونه
العد راهي واحمر القيض يرتاع
بالوادي اللي ما تعدد عيونه
خلف الأسيد الشراري
القريات