حلول اللغز

نشرنا في الأسبوع الماضي لغزاً كتبه الشاعر خالد سليمان الجريش من الرياض وكان حله الساعة أو ميناء الساعة تحديداً,, وقد وصلنا العديد من الحلول ننشر منها الصحيح في حله وفي صياغته وهي كما يلي:
حقيقه لغزك اعجبني واقول إنه حلو مفتول
عسى ربي يوفقني واحله ياعريب الخال
اقول الساعة بوسطه عقارب ركضها معقول
تسابق داخله تركض نشوفه ياوسيع البال
محمد ناصر الزيدي
الرس
***
هلا يا مرحباً باللي نظم لغزه بزين القول
بيوتٍ تعجب الشاعر وتعجب طيبين الفال
جوابه جاهزٍ عندي عس حلِّي يجي مقبول
هذيك الساعة بوسطه عقارب شفتها تجتال
صالح عبد الله الزرير النعيمي
الرس
***
ألا ياصاحبي لغزك عرفته مايبي له قول
ترى مضمارك الساعة وحلّي جاك يارجّال
وتمشي وسطها كلّ العقارب طول وقت الحول
تسابق داخل الساعة ولا هي لابسه لنعال
ناصر عبدالله الخرعان
جدة
***
هلا باللي كتب لغز يبي له بالتراث حلول
بيوته وافية جزلة مهي كيف أنت كيف الحال
ترى (الساعة) تدور ولا تعرف المشي عرض وطول
وهذا الحل يا خالد عسى الله يصلح الأحوال
عبد الله بن حمد البدر
الزلفي
***
حلول اللغز يا خالد اظنه ما بهن اميول
عقب ما قام با الصفحة فطينٍ جاب له معدال
ينحي شينها عن زينها والزين اله مدلول
كما الساعات بعضه غالي و بعضه بعشر ريال
فهد عبد الرحمن الجاسر
الاسياح
***
هلا يا مرحبا بك عد ما انشى وأمطر الهملول
وعدد ما هب ذعذاع الهبوب وكل غصنٍ مال
ألا يا خالد بن جريش كان العلم له مدلول
ترى المضمار للساعة ولا غيره أبد ينقال
فهد الجروان
الزلفي
***
قرينا اللغز في صفحة تراث ولغزكم معقول
ترى الميدان به ضيق وصغير وصانعه رجال
عقارب ساعة للوقت تضبط قاصره وطول
بداخل هالزجاجة تجتول في شمس وبظلال
سعد الكثيري
الحريق
***
هلا باللي كتب لغزه على ساسٍ صدر ووصول
ترى حله هو الساعة يجي مضمارها أشكال
تسابق به عقارب ما تمل من المشي وتجول
ولا تاقف ولو لحظة ولو وقّفَت شرينا ابدال
علي بن محمد بن فهد العمّار
الرياض
***
ألا يا مرحبا باللي عرفنا لغزه المجهول
وعلى خالد سلام وجاك ردي ياوسيع البال
ترى الساعة بها المضمار ما غيره يصير حلول
وعقاربها بداخلها تدور بوسطها يارجال
محمد بن عبد العزيز الخنيفر
***
أنا أجاوبك يا خالد عسى حلي يجي مقبول
وغيري من يشارك بالحلول وحلها الحلال
عرفنا لغزك الساعة عقاربها بها وتجول
خذ الزبدة ومالي والسوالف لوتروح طوال
نايف قزعان الحويماني
الرياض
***
الا يامرحبا بالصاحب اللي مقصده معقول
شديد البدع بالالغاز يطرب له وسيع البال
ترى مضمارك الساعة وخذها باختصار القول
انا ان كانه صدق ظني تراها هي يارجال
محمد عجاج العنزي
الخرج
***
قرينا اللغز يا خالد ومنا يا صلك مرسول
يجيك بحل لغزك ياوسيع المعرفة بالحال
تعين يا الجريش وشف على ساعدك له مدلول
عقارب ساعتك تركض على المضمار دون جدال
عطا الله بن سليمان العطا الله
الزلفي
***
الا يا مرحبا ياللي ذكرت بلغزك المعقول
وصايف طابقت حله وميزاته على الاخيال
تراه الوقت يا خالد مثالٍ قبلنا يقول
بساعة نضبط قياسه وتعرف تحسبه أجيال
عامر محمد عوض الشراري
***
ألا يا مرحبا واهلاً هلا يا اللي بدعت القول
وجبت اللغز والفكره جديدة والبيوت ثقال
ترى عقارب الساعة على المضمار عرض وطول
تدور ومشيها من دقته تضرب به الامثال
محمد بن حمد البدر
الزلفي
***
الا يا للي كتبت اللغز لغزك بالبلد مقيول
على الساعة يثبت بالمعاني صايب الاقوال
ينادي بالخبر راع الخبر من قمه المجهول
وشد وطاب منزاله على رأس الهدف نزال
خليف الحربي
الطائف
***
انا ابرسل لصفحات التراث الحل بالمرسول
عبر شاشة سريع الفكس ما يتعبني المرسال
نشدنا مركز التفكير وعلن علمه المنقول
يقول الحل ساعتنا الوفيه والعلوم اطوال
نافع الحربي
الرياض
***
أنا أبقول يا خالد عسى عمرك بخير يطول
إذا كان الفكر ما خان حل اللغز يارجال
هي الساعة لها مضمار يالطيب وفيه تجول
عقاربها على طول الزمن ياطيبين الفال
حواس الديري