اللغز

كان كاتب اللغز الماضي الشاعر محمد أبو دحيم من البدائع والذي يقول:
انشدك عن شيء تشوفه على الجيب
واللي يجي قدام دائم يشوفه
يقلط مع الحكام مابه عذاريب
وكم واحد قد صافحه في كفوفه
وقد توصل للحل شعرا:
اقول يا محمد عسى حلي مصيب
تراه عندي ما يلاقي كلوفه
هذا القلم موجود حول الدواليب
واحيان فوق الجيب كل يشوفه
فالح غازي الحربي - رياض الخبراء
الجيب جيب الثوب يا مدهل الطيب
ما هو من اللي في مساره تطوفه
فيه القلم ما فيه شك ولا ريب
وابي ارمعه مرتاح مامن كلوفه
حبيب فريح الشامي - البدايع
حييت يابو دحيم ونزيد ترحيب
اللغز جيد مايبي من يحوفه
الحل جاكم مامعه شك او ريب
هذا القلم يرسم ونقرا حروفه
علي الرشيد - رياض الخبراء
اللغز له رمعات تخطيه وتصيب
لامن قريت اللغز تفهم حروفه
هذا القلم يا منقع الجود والطيب
هذاالقلم واكيد هذي وصوفه
سعد صنهات السهلي - الدرعية
يا مرحبا بك عد مليون ترحيب
ياللي بنيت اللغز لغزك تحوفه
اللغز مضبوط ترى الحل تركيب
هذا القلم معروف نكتب حروفه
عبد المحسن بن محمد المحيسن - رياض الخبراء
ظنيت ظن وظني اليوم يبيصيب
( قلم ) جواب اللغز محدن يطوفه
مع خطاطين يصافحونه كتاتيب
أقسم به الله وشرفه في حروفه
عبداللطيف الحُمَيَّانِي – عنيزة
هذ القلم مافيه شكه ولا ريب
ياللي كتبت اللغز بانت وصوفه
له سيرة من فوق كل المكاتيب
في شيلته ماحدٍ يلاقي كلوفه
حمود بن زايد الدلبحي
من عهد ذيك المدرسة والكتاتيب
واللي بطريق العلم لازم يشوفه
اما قلم رصاص او حبر بالجيب
مامن غناة عن القلم مع حروفه
دخيل القحطاني - السيح بالرين
يا بو دحيم يا هلا وألف ترحيب
ترحيب الشيخ الكريم بضيوفه
ذاك القلم ما فيه شكٍ ولا ريب
على حسب وصفك تبيّن وصوفه
عوض لافي الرشيدي - حفر الباطن
يا مرحبا ترحيبةٍ كلها طيب
باللي كتب اللغز واللي يشوفه
واللغز وارد ورمعتي لازم تصيب
ذاك القلم دايم معانا نحوفه
راضي علي المطرفي - الخرج
الحل عندي و انا عطيب المضاريب
اول خلق الله عرفنا حروفه
ترى القلم مع كل شاعر مع اديب
و تلقاه في بيت الجاهل اعلى رفوفه
مهند محمد القطيط
كما توصل للحل نثرا
عبدالعزيز بن عبدالرحمن الدوسري - وادي الدواسر
لغز الأسبوع
كتبه للصفحة الشاعر أحمد صقر الموسمي من الرياض ويقول
أنشد العراف عن رجلن قوي
سلطته تلزمك في كل الحياة
من فعوله ضاع وقتك يالخوي
سلطته تبطل ليا ناش المياه
نستقبل الحلول عبر الايميل:
rb-khozama@alriyadh.com
أو الفاكس: 0114871070
كما نرحب بطرح الألغاز الجيدة