حلول اللغز

نشرنا الأسبوع الماضي لغزا كتبه الشاعر فواز الفالح يقول فيه:
أنشدك عن رجال ميت بدنياه
موته حقيقي والنفس فيه موجود
شكله غريب,, الجلد ناقص اعضاه
وميت نهار إنه بدنياه مولود
وإليكم الحلول الصحيحة التالية:
جوابنا يا بوحمد لا تناساه
يا طيب الجدين يا راعي الجود
الخط الاحمر نبتعد ما وصلناه
والحل صح وعندنا خمسة اشهود
المنتظر كنّه على الجمر ياطاه
وان حرك المنفاخ جمره ولع زود
الأيمن الزلفي
يرعد ويبرق بالسماء وانتثر ماه
على الجزيرة وارتوت ما تبي زود
هتان من عيد الفطر ما فقدناه
بأمر الكريم المعتلى راعي الجود
يا زين شوف البر يوم الله اسقاه
في مجلسٍ ما فيه حاسد ومقرود
ولهيل بدلا له على النار مركاه
وليا نفخ جمر الغضى ريحته عود
++++++++++++++++++++++++++++
محمد عبدالكريم الغزي الزلفي
++++++++++++++++++++++++++++
يا مرحبا ما غرد الطير بفناه
على الغصون اللي تراقص بها النود
يا هل الجزيرة جهدكم ما نسيناه
يدري به اللي يفرق البيض والسود
مجلس رجال الطيب ولجود والجاه
فنجال هيل ومبخرة فوقها عود
والنار والمجمار ودلال مركاه
معاد للمنفاخ حاجه ولافود
الزلفاوي الزلفي
أهلاً هلا باللي حميده سجاياه
إعداد ما تنشى مخاييل ورعود
يا مرسل للغز لغزك عرفناه
منفاخ تنفخبه ليا دخّن العود
++++++++++++++++++++++++++++
فهد دغيم الضبيب الزلفي
++++++++++++++++++++++++++++
اجمل تحية للجزيرة وتهناه
وكل من يساهم في تراثه بمجهود
ومن التراث الحل واضح بمعناه
منفاخ والمنفاخ جلد على عود
منيف صحن الشمري .حفر الباطن
++++++++++++++++++++++++++++
عنبر التراث الي على القلب محلاه
نرسل تهاني العيد وزهور وورود
لجميع مسلم قاصي الدار وادناه
والحل منفاخ النويره يا بو سعود
فيصل بن متعب الشمري
اللغز واضح يا بن فالح امبداه
اللي على صفحة مدارات موجود
منفاخ والمنفاخ بيِّنا معناه
عند الدلال اللي بهن هيل مع عود
++++++++++++++++++++++++++++
سعيد مسعد السليمي
++++++++++++++++++++++++++++
بتراثنا لغز لفواز شفناه
صحفة توفر كل ردٍ ومردُود
نشكر محررها على شغل يمناه
ومن كل لونٍ يفتح النفس مرصود
الحل منفاخٍ مع النار تلقاه
مع الدلال ابكل الاوقات موجود
علي رشيد الرشيد رياض الخبراء
عيد الوطن مبروك والعيد يزهاه
الله يعزّ الدين هو خير معبود
ويا ما حلا الدلة على النار مركاه
لا سقتها للي من اطباعه الجود
وإذا الشمال اليوم لنارك اطفاه
انفخ ترى المنفاخ يا القرم موجود
راشد بن ناصر الشقيق الأسياح
===============================
عليك يمن شد واقفت مطاياه
حالي من الفرقة نحل كنه العود
ويلاه من نار الفراق ألف ويلاه
ما يذكره فواز سبب لها زود
ثقل البقمي
يا مرحبا باللغز واللي تبناه
ترحيبة قلته عدد ذاري النود
لغزك بحثنا عنه حتى لقيناه
جلد وسط لوحين منفاخ موكود
++++++++++++++++++++++++++++
أحمد القشعمي
++++++++++++++++++++++++++++
يا اللي حكمت اللغز وأحكمت معناه
أبشر بحله حل واضح وماكود
اللي يشب النار للضيف لي جاه
تلقاه عنده ينفخ النار وتزود
عبدالله صويان العرجاني
الأفلاج ْْالنايفية
لغز التراث اللي قريناه محلاه
نشكر جميع اللي بذل فيه مجهود
منفاخ نار حل لغزك ومعناه
عسى جواب اللغز ماهوب مردود
معاذ بن إبراهيم بن عبدالرحمن الربدي
بريدة
الياسمعنا اللغز نكشف مغطاه
ونقول للي صانعه دمت محمود
لغزك تراه اليوم عندي,, وشفناه
حول الدلال الصفر والجمر والعود
اسمه .منفاخ وخشمه الجمر يصلاه
وخذها حلول اللغز يا الفالح,, وزود
محمد المويعزي بريدة
مبروك عيد الكل يا رب يالله
عسى يعود ابخير يا خير معبود
فواز هذا الحل يا عل تقراه
وآبختصر والرد ما يحتمل زود
اللي تبي منفاخ حنا عرفناه
ما هو ابكيفه ينفخ النار محدود
فهد بن عقيل الطويان بريدة
يا مرحبا باللي لنا اللغز سواه
عداد ماهل المطر,, واخضر العود
واللغز,, يا فواز جيد بمعناه
عز الله ,, انه سالمٍ كل منقود
وأنا ابجيب الحل ما به مراوه
منفاخ,, يا فواز والحل ماكود
زهران عون الله المطيري بريدة
بديت بسم الله والحمد للَّه
الحمد لك والشكر يا خير معبود
ناسٍ تصيح من القهر والمعاناة
وحنّا بخير وامن وسهود ومهود
متمسكين بديننا ما تركناه
ما عندنا مذهب شيوعي ولا يهود
شمس الحقيق نورها بيّن أعلاه
وعين الحسود آغز في وسطها عود
من ضاع خلق صار ميت بدنياه
منفاخ ما غير النفس فيه موجود
صالح بن سفر العمري
فواز لغزك يا رفيقي عرفناه
ومني جوابه يا هل الطيب مردود
أقول انا المنفاخ وحنا هجرناه
وقته مضى ومعروف في عصر الجدود
واليوم بالاثار باقي بذكراه
وجانا زمان العز والخير والجود
++++++++++++++++++++++++++++
محمد بن عبدالعزيز الخنيفر أشيقر
++++++++++++++++++++++++++++
أهلاً هلا بالخط ساعة قريناه
خطٍ تعدى النقص ما فيه منقود
في صفحة المحبة ولغز عرفناه
هذا لزوم النار لاشعالها زود
منفاخ نارٍ كثرة النقش حلاَّه
له حزة يوم الملا كلها ارقود
فهد العلي الرياض
يا مرحباً ماهل مزن ونثر ماه
وما لاح برقٍ وماضت رعود
باللي بدع لغزٍ على الكيف مبناه
صاغه وسيع العرف عن كل منقود
والظن ان ما خاب حله عرفناه
حله ترى .المنفاخ جبته بلا زود
سليمان زيد الخنيني الزلفي
يا زين لغزٍ بالجزيرة قريناه
لغزٍ لابن فالح بعيدٍ عن الكود
وساعة قريبة بين الوصف معناه
منفاخ ضوٍ والنفس فيه موجود