منبع الجود

يا سيدي سلمان لو غبت موجود
بقلوبنا يا رافي كل خله
حبك نماري به ومن جودك أجود
وحبك بقلبي دولة مستقلة
يا مرحباً يا سيدي منبع الجود
يا شيخ نجد ألا ذرى نجد كله
ستر الرياض اللي بمداته تزود
حتى غدت بين النجوم المهله
تشفق عليه وحبها مال له أحدود
وأن غاب عنها ما تزحزح محله
مكانه الثابت وإذا راح بيعود
يرجع لحب ما تنكر لخله
عشقه لها شامخ وهي تعشقه زود
عشق تعدى النايفات المطله
حب وغلا والود ما هو بمحدود
بين الرياض وعشقها اللي تجله
خمسين عام والوفاء حبل ممدود
بين الرياض وسيفها اللي تسله
سيف العدل ذكره مع الناس محمود
اللي أعلوم المرجلة ما تزله
ذخر اليتيم اللي من الوقت مضهود
اللي محاذيف الزمان أتحبله
وعون الأرامل فالقسى ساعد العود
منقذ بفزعاته كبود مغله
ياقف مع المحتاج ذا العلم ماكود
علمي عليه أشهود دقه وجله
وهرج بدون اثبات عيب ومنقود
يأتي على صاحبه عيب ومذله
والشعر يأتي فيه شعله وبارود
وفيه الذهب من يعرفه ما يمله
والشعر أمانة بين قاصد ومقصود
وما كل من يبغى جزيله يدله
وهبه من اللي للمخاليق معبود
اللي لمن يعصي لأوامر يذله
أسأله التوفيق والعمر محدود
مسلم سعودي ملتي خير مله
مهدي بن مسفر الحبابي