حلول اللغز

نشرنا في عدد الجمعة الماضي لغزاً كتبه الشاعر دخيل رغيان الفريدي يقول فيه:
أنا بنشدك عن أمٍ ولدها حاضر ماجود
ولدها بالوجود وهي بنفس الوقت ماجوده
تمر بيومها سبعة عشر مرة ونوب تزود
عدد مراتها متعرضة للنقص والزوده
هي اللي ما خلقها الواحد المعبود يا بو حمود
ولا كرس لها البيطار من فكره ومجهوده
وجاءت الحلول الصحيحة:
دخيل جاب لغز مختلف ما هو على المعهود
أبقول الصراحة لو في هالوقت مفقوده
طرات اللغز حله ما يجي سهل بلا مجهود
نبي لغز مثل هاللغز يحمل شارة الجوده
وأنا اقرأ الفاتحة في كل ركعة وأعبد المعبود
وهي أم الكتاب وسورة للحمد محموده
سعود بن شنار السهلي
الدرعية
****************
ألا يا مرحبا وعداد ما يخضر نبات العود
على اللي كاتبٍ لغزٍ وباذل فيه مجهوده
أنا ساعة قريت اللغز حله ما يبي منشود
تراها (الفاتحة) حل السؤال وهاك مردوده
سعود بن فراج السهلي
الدرعية
****************
هلا باللي وضع لغز الجزيرة باذلا مجهود
ويشكر كاتب الصفحة وكلا تشكر جهوده
انا حلي على المعنى صليب وحافظه بقيود
ولاني بأستعير أبيات مقيولة ومسروده
الأم الفاتحة كلام جت في كتاب الخالق المعبود
رفيع قدرها دايم مع الركعات معدودة
خالد سليمان الجريش
الرياض
****************
هلا يا مرحبا ترحيبة بأهل الوفا والجود
عدد برقا تلامع فالسحاب ويرزم رعوده
وعدد من كبر وصلى الصلاة لربه المعبود
بدأ بالفاتحة أم الكتاب وصلى لمعبوده
وحل اللغز يا رجال لا ناقص ولابه زود
على تراث الجزيرة جبت لك حله ومردوده
ضمن السناني
****************
هلا بالشاعر اللي قاد جزلات المعاني قود
عطاه الله وسمح دربه بمعروفه وجوده
عنيت أم الكتاب الفاتحة أم الشفا والفود
عسانا من فضايلها نصد ابيس وجنوده
عبدالرحمن المقباس
****************
ألا يا مرحبا بك يالفريدي غايب أو موجود
حبكت اللغز بأسلوبك وهال الناس من جوده
وسلامي زود للمشرف وأزيده للجماعة زود
وكل اللي على الصفحة لهم أفعال محموده
أم القرآن هي حله بليا نقص والا زود
هي السبع المثاني في صحيح القول مشهوده
علي رشيد الرشيد
رياض الخبراء
****************
نقدم لك تحية عد ما هبت هبوب النود
الا يا شاعر بالعرف لك بصمات مشهوده
كتبت اللغز في معنى مميز سالم المنقود
عرفنا لغزكم,, والحل حددناه بحدوده
ليا صلى المصلي يالفريدي لله المعبود
بدء بام الكتاب,, وسلم النيه لمعبوده
مفرح علي الحربي
بريدة
****************
أنا أشوف الجزيرة صار فيها الزود بعد الزود
تقوم بها رجال تعرف النقصان من زوده
وأنا بشكر محرر لغزنا لاجله بذل مجهود
عسى ربي يزيده من تساهيله ومن جوده
قريت اللغز وارسلت الجواب إن كانه المقصود
تراها الفاتحة تطرد بليس الشين وجنوده
نايف بن عبدالله بن غشام الجناحي
القويعية
****************
هلا يامرحبا في صفحة تسلم من المنقود
ونشكر كل من فيها على دوره ومجهوده
ولغزك واضح جدا وعندي لو بغيت شهود
ولانا بالذي لا شاف لغز قال يا كوده
وهي أم الكتاب اللي قرايتها تجيب الزود
ويقراها الذي يرغب بعفو وحلم معبوده
محمد بن سعد بن غشام آل جناح
القويعية
****************
يقولون الفريدي جابله لغز عليه شهود
يبي حله من اللي يعرفون اللغز وحدوده
إلى بسملت فقر الحمد واطلب ربك المعبود
وكلاً عارفن دخله بها الدنيا ومردوده
تراها الفاتحة في كل فرض ذكرها موجود
على كل الفروض وعدها وتجيك معدوده
فهد الثميري
****************
كتبت الحل وارسلته سريع بوقته المحدود
إلى اللي كنها الدره بوسط التاج معقوده
إلى صفحة تراث التي تطورها عليه شهود
ومن يعمل بها يشكر على جهوده ومجهوده
وحل اللغز كان إني بخيص واعرف المقصود
تراها أم الكتاب اللي بها الآيات مشهوده
عطا الله سليمان العطا الله
الزلفي
****************
عدد ما مال غصن وانثنى مع هفهفات النود
هلا حي الله اللي بالمواقف يثبت وجوده
بعد واثنى سلامٍ خالطه ريح الفل والعود
على اللي صفحته فيها التميز فاضت عدوده
وإلى من الفريدي قال ورجح حجته بشهود
أقول الفاتحة بكتابنا قصده ومقصوده
فهد الجروان
الزلفي
****************
مضى عام المحل واقبل ربيعه واسترد الذود
هذاك الفارس اللي ما فقد سيفه وباروده
تخطى كل حاجز عارضه والحمد للمعبود
بعد صلى الفرايض واستخار الله بسجوده
على باله خطر لغز الفريدي واجهد المجهود
وقال الفاتحة حله لو الأفكار محدوده
خلف الأسيد الشراري
القريات
****************
ألا يا مرحبا بك عد ما هبت هبوب النود
سلام واف مني ولغزك هاك مقصوده
إلا منه زمانك جار وضقت وخاطرك ملهود
عليك بفاتحة مصحف إلهك وانتظر جوده
نصيحة واحد لك يالفريدي ما يبي مردود
تبينت الحقيقة في قيلك جاك منشوده
جار الله بن محمد الغزي
الزلفي
****************
تحية للفريدي والمعد ومن قرأ المردود
وهذا اللغز عندي بيّن حله ومقصوده
تراها أم القرآن الفاتحة كلمة المعبود
كلام الله ما هو مخلوق نورٍ بين حدوده
قائد سماح العنزي
****************
أنا اهنيك يا الشاعر قوافي ما بها منقود
حكمت اللغز فيها واستحقت طبعة الجوده
انا لولا جزالة ما كتبته ما ابعث المردود
تركت الشعر عن رغبة ولا فكرت بالعوده
عموما لغزك الطيب براهينه عليها شهود
تراه (الحمد) بالأوقات مفروضة ومحموده
****************
حريب الياس
بريدة
ألا يا مرحبا ترحيب طيب مثل ريح العود
هلا يا شاعر هز المشاعر طيب,, مقصوده
قرينا لغزك الوافي,, عرفنا القصد,, والمقصود
على العرّاف يا هونه,, على الجهال يا كوده
صلاة المسلم المؤمن,, رضاء للواحد المعبود
يعيد (الفاتحة) فيها بخمس أوقات معدودة
زهران عون الله المطيري
بريدة
ترى دخيل الفريدي بالمعاني كرس المجهود
نشد عن أم ما خلقت,, وبين الخلق محموده
وهي اللي بعد تكبيرة الأحرام يا أبو سعود
بها سبع المثاني ياهل التوحيد موجوده
متعب حمود الغيداني
القصيم
****************
على صدر الجزيرة للعلوم الغانمات عقود
مثل ما قالوا العد القراح يصدر اوروده
اكيد اللي يعرف البيض يقدر ينتبه للسود
ضروري نبتدي بالحمد والاعمار محدودة
الأيمن
الزلفي
****************
على فنجال هيل المرجلة والمبخره والعود
تعد الجاذبية والجهات الخمس وحدوده
مثل هذا ابني ياهل الوفا والمعرفة والجود
على المعنى الثمين الجزل تمطر مزنة الجوده
آله الكون عبدك ساهر والعالمين رقود
بدا بالفاتحة لرضاك صلى ونت معبوده
محمد عبدالكريم الغزي
الزلفي
هلا يا مرحبا ريحه كما الكادي وريح العود
أزفه للرجال اللي لهم أفعال محموده
أشوف حميدي الحربي ظهر في صفحته مجهود
ينظم صفحته حتى غدت للكل معهوده
يصلى مسلم فرضه لعله يرضي المعبود
ويقرا الفاتحة فيها وعند الناس مشهوده
علي بن خالد الحمد
****************
سلام الله سلام يحمل الكادي ودهن العود
على إللي صفحه الألغاز شعت نور بوجوده
دخيل ابو رغيان الفريدي لغز الماكود
تراه أم الكتاب الحمد والقرآن مقصود
هادي مريط اليامي
****************
قريت ابيات لغز للفريدي قدرها مشهود
حشام مكرمات مغلفات بطابع الجوده
تراها أم الكتاب انكان ظني يدرك المنشود
بها ترتيب ركعات الفروض الخمس معدودة
ولا فراد الجزيرة كل شكري والثنا مردود
واختمها بشكري للفريدي قدر مجهوده
حمود بن جعيثن العطاوي