حلول اللغز

** نشرنا في الاسبوع الماضي لغزا كتبه الشاعر مشاري خالد الدعجاني يقول فيه:
يا كبر رجلينه ويابطي ممشاه
والى مشى هلت دموعه هماليل
يا كثر ما بالعين ياناس شفناه
في سهلها والا بروس العزاميل
وجاءت الحلول كما يلي:
لغزٍ قريته ما بعد شفت حلياه
وحله كما بدر ظهر تالي الليل
المحوري والزرع حله ومعناه
يا زين شوفه فوق حمر الغراميل
العقلاوي (الزلفي)
***
من يوم جا الرشاش جا الخير وياه
كثر الزرع واهل الزرع والمحاصيل
ولا عاد به ساقي ورايس ومسحاه
تربح الفلاح عقب البهاذيل
سرور سفاح
القصيم
***
عرفت انا لغزك وعزيت مبناه
وبنيت انا مبنى رجال حلاحيل
كم تاجرٍ رزة على الزرع واسقاه
يسقي الزروع اللي تجيب المحاصيل
فهاد عبدالله السرجاني
الأفلاج النايفية
***
ياللي كتبت اللغز واحكت معناه
احكتها وابدعت في اللغز با الحيل
لغزك يا ابو خالد ترانا عرفناه
هذا هو الرشاش يا موفي الكيل
عبدالهادي فهاد العرجاني
الأفلاج النايفية
***
يا مرحبا تعداد نوٍ نشر ماه
نوٍ بروقه ضاحكة في دجى الليل
اللغز يا خالد ترانا عرفناه
رشاش محور واضح كنه سهيل
موسم بن سفر القثامي
الطائف
***
اللغز لاجاء كامل قلت محلاه
وسط الدجى يضوي كما نور قنديل
صاغه ابو خالد وخطه بيمناه
والمحوري مغزاه من دون تطويل
محمد بن حمد البدر
الزلفي
***
شفته لياقته مشي يقصر اخطاءه
يمشي نهار ونوب يمشي مع الليل
ياقف ويشرب ناحل العود من ماه
ولولاه ما جا بالمزارع محاصيل
الوفق الله صاحبه حصل امناه
وان عاكسه حظه جده الغرابيل
صويلح بن عبيسان الشيباني
الرياض
***
جواب لغزك يا مشاري كشفناه
ساعة قريت اللغز يابن الرجاجيل
رشاش في وسط المزارع لقيناه
هذا اختصار الحل من دون تفصيل
صالح عبدالله التميمي
الرس
***
ياهل الجزيرة جهدكم ما جحدناه
الشكر والتقدير والعود وسهيل
كن القلم مربوط كفه بعلباه
يدور مثل المحوري فالمحاصيل
كاتم الزلفي
***
ما لاح براق الحيا وننثر ماه
من مزنه يوم اقبلت كنها الليل
مشاري الخالد كسبها بيمناه
الشاعر اللي يوفي الوزن والكيل
المحوري يا طيب الجد تلقاه
فالمزرعة ما فيه حيل او محاصيل
محمد عبدالكريم الغزي
الزلفي
***
الحل من بعد التحاليل تلقاه
ما ينكشف ياكود بعد التحاليل
اللغز رشاش اذا فتر محلاه
شفت المطر منه وتحريت للسيل
سعد بن صنهات السهلي
الدرعية
***
هات القلم واكتب علىنفس مبداه
واكتب مرد اللغز زين التماثيل
قل يا مشاري حل لغزك عرفناه
رشاش يسق الزرع مشيه تماهيل
علي بن ناصر البدراني
الدمام
***
ليت المطر دايم على طول مسقاه
(والمحوري) يبلى ولا له منازيل
بس سنة الله خالفت ما تمناه
وقتٍ شتا ووقتٍ تدور مظاليل
أحمد بن عبداللطيف المديد
الرياض
***
حيّ السحاب اللي علينا نثر ماه
واسقى بغيثه ضاميات المحاصيل
(رشاشها) اللي داخل الزرع نلقاه
ياقف اليامن هل ودق المخاييل
منصور بن عبدالله المجيدل
الرس
***
المدح بتراث الجزيرة كتبناه
باخراجها وأسلوبها دون تهويل
ياللي كتبت اللغز قريناه
في صفحة هل الكيف والراي والهيل
واظن لغزك كلنا يوم شفناه
انظارنا (للمحوري) صارت تميل
عبدالله بن سليمان العطالله
الزلفي
***
نهج الجزيرة يا مشاري رضيناه
وصحيح كثر الهرج ما به محاصيل
قد قالها راكان في ختم معناه
القل يكفي عن كثير الهطابيل
والزرع لا منا لك الله بذرناه
(المحوري) يرويه مثل المخاييل
فهدالجروان
الزلفي
***
إعداد حرفٍ بالجزيرة قريناه
حييت يا كاتب جديد التماثيل
اللغز والله يا مشاري عرفناه
رشّاش يسقى زرعنا والمحاصيل
حمدان صالح السكران
الزلفي
***
لغز يا بو خالد ثمين وعرفناه
وسط المزارع له مكان ومداهيل
لهل دومه يروي الارض من ماه
ولولا دموعه ما جنينا المحاصيل
صالح بن منور البشري
القصيم رياض الخبراء
***
مشاري اكتب ماتصور وعطناه
اسأل وتلقا الاجوبة والتحاليل
واضح سوالك (محور الري) معناه
لا ارخى هماليله تجود المحاصيل
من حط تسع ابراج في ملكه اغناه
وكثرت بعد فقره عليه المداخيل
محمد هذال آل بريك
اتصالات الرياض
***
يا مرحباً بلي كتب لغز شفناه
عبر الجزيرة باغي له تحاليل
لغزك عرفته يوم حنا قريناه
رشاش مويه يسقي الزرع كالسيل
سعود بن فراج السهلي
الدرعية
***
عسى السحاب اللي طفح وارتدم ماه
تسقي مداريجه فروع المحاصيل
من شان راع الزرع تروي ظماياه
والله عن الرشاش يغنيه بالسيل
مشعل سعد العواد
الزلفي
***
ياللي كتبت اللغز حنا عرفناه
لغزك مبين حيث ما له تماثيل
رشاش بابراجه على الارض ممشاه
ويسقي زروعٍ بالسهل والغراميل
صالح عايض الشراري
منطقة الجوف (العيساوية)
***
جاك الجواب بحل لغزك ومعناه
يا شاعرٍ شبيت نار المعاميل
اللغز رشاشٍ يرش الزرع ماه
في مجرهد الارض يسق المحاصيل
محسن عبيد السهلي
***
لغز نشرته يا مشاري عرفناه
والحل ياصل فاكس والا مراسيل
ترى السحاب اللي من الله رجيناه
يمطر على روس النخيل المظاليل
علي بن عبدالله الحسين
بريدة
***
هل السحاب اللي من الغرب منشاه
وفاض البطين وسيلته المخاييل
والحل رشاش على الزرع شفناه
يمشي على هونه يرش المحاصيل
عبدالعزيز بن ناصر السياري
ضرماء
***
اللغز واضح بالجزيرة عرفناه
عند المزارع يالذكي له مداهيل
واللي خذا المليون ما عاد ينساه
رشاش زرعٍ جاهزٍ للمحاصيل
هديبان بن راشد الجعفري
الدوادمي
***
الله يعيد ايام وقت عرفناه
وقت الرخا به يكثرن المحاصيل
رشاش محور وان مشا ينتثر ماه
ما له شبيه الا هتون الهماليل
ان سهل الله ما يبي حد يرعاه
يمشي على الكهرب قليل الغرابيل
مصعب بن عبدالله المنيع
الزلفي
***
اللغز يابن العم حله عرفناه
دمعه لراعي الزرع يجزي عن السيل
رشاش مويه كل زارع تمناه
من جم دمعة يجمعون المحاصيل
قاعد حمدي العصيمي
الرياض - السويدي
***
لغزاً على الصفحة جديد وقريناه
يازين لغز الطيبين المشاكيل
حول المزارع والزراعة ذكرناه
عاشوا به اللي يرتجون المحاصيل
فهاد عايض بن عمير
***
أبدي بحمد اللّي كثيرٍ عطاياه
رب قديرٍ فالق الصبح بالليل
واقول يا مشاري ترى الحل جبناه
رشاش مويه بالسهل والغراميل