حلول اللغز

نشرنا في يوم الجمعة الماضي لغزا كتبه الشاعر هديبان الجعفري وجاءت الحلول كما يلي:
وادي مرخ شال الكسر يا هديبان
وصل اجزرة مليان يمشي بهونه
من مزنة يا الجعفري جت مسيان
رعادها اللي بالحفر يسمعونه
وادي الرمة جا يا ابيض الوجه مليان
صافي يشوق العين يا زين لونه
الزلفاوي
الزلفي
***************
يا مرحبا باللي بنى اللغز باتقان
عدة مباني الرس ومن يسكنونه
وادي الرمة حله ولانيب غلطان
سكان نجد كلهم يعرفونه
صالح عبدالله التميمي
الرس
***************
ياللي كتبت اللغز شوّقت ولهان
للوادي اللي راحتي في ركونه
ممشاي به لو كنت جايع وضميان
يجلي عن القلب المعنى حزونه
وادي الرمة جعله الهتاف الأمزان
الوادي اللي ربعنا يسكنونه
محمد سعود بن زايد البيضاني
اللغز واضح للذكي يا هديبان
يالجعفري كل البدو يدهلونه
علم عليه من المشاكيل برهان
احسب حسابه قبل لا تنزلونه
هذاك اللي لا دهرت كل الاوطان
وادي الرمة ما اظنكم تجهلونه
حمود نويفع الغيداني
دخنة
***************
قال الذي في حل الالغاز ولهان
مع لابه بتراثنا يكتبونه
يوم إن ابن راشد كلامه لنا بان
وسط الجزيرة واضح ينشرونه
وادي الرمة يطوي براري وضلعان
يبدا من الحرة قوية امتونه
علي رشيد الرشيد
رياض الخبراء
***************
أهلا هلا والرد جاكم ببرهان
جاكم على المطلوب ياللي تبونه
أقول وادي الرمه الحل يا ملان
معروف كل الناس ما يجهلونه
واد يسر القلب لا صار مليان
يا زين شوفه يسعد اللي يجونه
***************
محمد بن عبدالعزيز الخنيفر
***************
أبدا بذكر الله على كل الأزمان
اللي جميع الخلق ما يعجزونه
وسلام يا هديبان ولكل الاخوان
نبي نشارك بالجزيرة أفنونه
وادي الرمه إن كنت ماني بغلطان
هو حل لغزك بين من عيونه
كريم عيسى العنزي
الخرج
***************
يا مرحبا يا صاحبي يا هديبان
اللي بدا قاف تهيض لحونه
انا عرفت اللغز كله على شان
ذكرتني مرباعنا العام دونه
وادي الرمة يالله تسقيه الامزان
حتى البدو من كل ديره يجونه
***************
ماجد بندر العتيبي
الرياض
***************
عرفت أنا الرجل الذي دوم عريان
وكل العرب لا بد يوم يجونه
والحل واضح يا ابن راشد هديبان
ولا هقيت ان العرب يجهلونه
وادي الرمه وادي ومن ضمن وديان
يملاه ربي من مخايل مزونه
***************
عبدالإله حسن القعيري
المزاحمية
***************
يا مرحبا ترحيبة يا هديبان
بك يابن راشد جعل مالك مهونه
الله يجيب الخير من منشي الأمزان
يستر عراه العشب ويحول دونه
وادي الرمه ان كان ماني بغلطان
هو حل لغز الجعفري تاجدونه
الشاعر محمد نوران جهيم الرشيدي
الرياض
***************
ياما حلى لغز تقل غيث الأمزان
من شاعر جابه لناس يبونه
لغز تقل واد الرمه قدر الامكان
من فرحتي به يوم شفنا بيونه
في صفحة للشعر منبع وعنوان
شعر يضم اتراثنا في ركونه
محمد المويعزي
بريدة
***************
البحر هو موطن خطر وين ما كان
ياخايفين البحر لا تقربونه
وادي الرمه من نازل المزن رويان
وحمى الصحابة لخيلهم يذكرونه
بدر الحزيمي
***************
هديبان بن راشد بالألغاز فنان
عبر الجزيرة لغزكم تنشرونه
وادي الرامة يجري كما وصف شريان
وسط الجزيرة والعرب يعرفونه
حليت لغزك يافتى الجود باتقان
هذا هو الحل والشكر تقبلونه
عبدالعزيز الرعوجي الفهيد
الأسياح/ عين بن فهيد
***************
اللغز,, نعم اللغز صاغه هديبان
عن وادي عشق المطر في بطونه
واد الرمه ماظن يحتاج برهان
كم شاعر أهداه أعذب فنونه
أنشهد أنه ذايع الصيت له شان
يارب,, تسقيه المطر من مزونه
سهر الحسين
الرس
***************
باسم الذي لا قال للشي كن كان
اللي عباده دايمٍ يرتجونه
وادي الرمه معروف ياذرب الايمان
واللغز واضح والعرب يفهمونه
سعد باني المخاريم الدوسري
وادي الدواسر
***************
لغز قريته بالجريدة مسيان
عرفت حله وأعجبتني لحونه
لغزك يا ابوراشد موضح ومليان
وأبا أرسله لتراثنا ينشرونه
وادي الرمه معروف في كل الأزمان
وأهل الجزيرة كلهم يقطعونه
ليانبت عشبه تهاواه الأظعان
تلقا البدو غب المطر ينزلونه
العضياني
القصيم المليداء
***************
قريت لغزك واضح يا هديبان
وعرفتنا حله ولالك مهونه
عزالله ان اللغز واضح ومليان
وادي الرمه كل العرب يعرفونه
محمد باني عقاب الدوسري
الرياض
***************
يازين وبل الغيث لاهل ودان
في مرتع وأهل الحسد ما يجونه
تلقى نباته مثل زرع ببستان
متخالف بالوصف ريحه ولونه
شوفه يشوق اللي على البر شفقان
لا صار فيه الطير يزعج لحونه
ويزيد حسنه ياهل العرف نيشان
وادي الرمه لاسال واسقى غصونه
فهد الجروان
الزلفي
***************
اللغز فتنه والولع طبع الانسان
والقاف تفتني عجايب إفنونه
لغز التراث اليوم قاله اهديبان
اللي يبي حياه واللي تبونه
اللي يبي معروف واضح للأعيان
وسط الجزيرة والعرب يعرفونه
وادي الرمه غطى على كل وديان
عساه يجري من همايل إمزونه
فهد بن عقيل الطويان
بريدة
***************
الكيف طاب وجبت انا البيت مليان
بيت يسلي من تسمع لحونه
لغز الجزيره يوم جابه هديبان
معناه جانا من فرايد فنونه
عسى السحاب اللي به الرعد رنان
سيله على وادي الرمة يذكرونه
ياخذ عليه اسبوع ديمه وهتان
واسبوع تلقى العشب يسحرك لونه
عطا الله بن سليمان العطا الله
الزلفي
***************
سلام مني عد همال الأمزان
واعداد ماهل المطر من مزونه
للشاعر اللَّي لغزه اليوم مليان
مليان لغزه والعرب يفهمونه
وادي الرمه حله ولا نيب غلطان
وكل الرجال الفاهمه يرمعونه
حماد جزاء الحنيني
ضريه
***************
لغز قريته بالمدارات مليان
من شاعر واد الرشا حال دونه
هذي حلول اللغز ماني بغلطان
وادي الرمه لاسال لا تقربونه
نصيحة مهداه للشاعر هديبان
عن الشعيب العود يبعد اضعونه
مساعد بن عبلان بن شويمس
الرياض
***************
اهلا هلا بك مرحبا يا هديبان
ماناحت الورقا بعالي غصونه
الحل هو وادي الرمه طوَّق ابان
لا سال واخضر من بعيد يجونه
منصور عبدالله المجيدل
الرس
***************
قريت لغز لبن راشد هديبان
يسحب على صدر الجزيرة اردونه
يمشي على وادي الرمه بايسر أبان
ما بين ابانين استقامت اركونه
نافع الحربي
الرياض
***************
يا حلوها يوم اقبلت يا هديبان
رحب بها الجو اللطيف بسكونه
ماهيب عجله جت تهادى مسيان
يضحك محياها عطوف حنونه
يا ليلة ما بين بارق وهتان
يرقص لها العشب اوتمايل غصونه
وادي الرمه مع طلعة الشمس مليان
وادي الرشا يقلب ولا يقربونه
محمد بن عبدالكريم الغزي
الزلفي
***************
يا مرحبا واهلاً هلا يا هديبان
اعداد ماهل المطر من مزونه
واعداد ما سالت من الغيث وديان
منها الرمة لا سال زادت ضعونه
وسلام مني عد ما قيل قيفان
على الذي تراثنا يحفظونه
محمد بن حمد البدر
الزلفي
***************
عسى المطر يسقي لنا كل الاوطان
خير من المنشا تكاشف مزونه
وادي الرمه يجري من الغيث مليان
ياخذ شهر روادنا يذكرونه
نبت الخزامى والنفل سر الاعيان
تشبع به الذيدان بأول حتونه