حلول اللغز

نشرنا في الاسبوع الماضي لغزا كتبه الشاعر محمد بن احمد الموسى من الرياض وقد جاءتنا عشرات الحلول,, وكان الصحيح منها كما يلي:
سلام مني ياصل اللي يعرفون
سلم الرجاجيل القديمه ولونه
تراثنا ماينمحي دوم مصيون
واكبر دليل الجنادرية, تجونه
تلقون فيها النجر صوته له فنون
ولو يتعب الكفين واجد يبونه
نايف محمد الأسيد
القريات
***
يامرحبا عداد ماهلت مزون
واعداد مادن الرعد في مزونه
وصوت النجر من اول لويد قون
صوت ينادي للنشاما يجونه
كيفٍ يدقه ماهو بكيف طاحون
يجلا عماس الراس لو يشربونه
محمد بن معتق الغرابي
عنيزة
***
ياللي تبون الحل حاضر وممنون
نكتب جوابه دامكم تطلبونه
هذا النجر من دون شكٍ ولا ظنون
البادية وأهل المدن يعرفونه
صالح عبدالله التميمي
الرس
***
يامرحبا ياكاتب اللغز بفنون
والفن وهبه والعرب يرغبونه
ذكرتنا نجرٍ بذا الوقت محزون
اليا ذكر ماضيه هاضت شجونه
عبدالله بن حمد البدر
***
ياللي على صعبات الالغاز تشفون
سلام مني عد زامي مزونه
هذاك نجر عند الاجواد مصيون
ماغيرت سود الليالي بلونه
للنار شب وروجع النجر بلحون
تجذب مسايير المناره لحونه
ضيف الله ماطر العتيبي
الداهنه
***
اللغز مهما كان غامض ومدفون
اهل المعاني بالشعر ينبثونه
وان كان صار اللغز ماهوب مكنون
ما اظن قارين اللغز يجهلونه
والحل واضح دونما شك وظنون
النجر الاصفر كلكم تعرفونه
محمد بن غشام الخالدي
القويعية الفرعة
***
يامرحبا اعداد من هم يصلون
واعداد غيث مقبل من مزونه
جواب لغزك نجر ياللي تحلون
ويكثر ربع في الخلى يشترونه
محمد سعيد العرجاني
الخرج
***
ياناشد الشعار خلك على الهون
لغز الجزيرة كلكم تحترونه
النجر وقت فات غالي وممنون
واليوم وسط الدار ماتسمعونه
جت عقبه الطاحونة وصار مركون
حتى ان بعض الناس مايعرفونه
فواز ضيف الله القويضي
عقلة الصقور
***
سر ياقلم واكتب من الشعر مازون
ثلاثة ابيات على مايبونه
انا عرفت اللغز والحل مضمون
واوضحه للي يبا يجهلونه
نجرٍ علا حوته له الناس يوحون
ملبيه حوته وتعشق لحونه
دخيل سجدي النفيعي
الخرج
***
ابدى باسم رب الملا خالق الكون
مالي سواه ارجي ثوابه وعونه
لاحظت نجر الماء صامت ومجرون
عابت ترانيمه وشكله ولونه
جات المطاحن واصبح الحب مطحون
مع التطور طاح كرته وشونه
محمد هذال ال بريك
أبو أمواج
***
اللغز مليان وعن النقص مصيون
وافي مثل من صاغ جملة فنونه
نجرٍ يصوّت للمسايير يلفون
لاسمعه الطرقي ينوخ ضعونه
وقتٍ مضى بين المعاميل مرهون
واليوم بالكهرب تحرك سنونه!
محمد مرشد التميمي
حائل
***
يامرحباً باللغز لاجاك موزون
لغز الجزيرة والعرب ينظرونه
لغز يجي باسبوع وبيوم مضمون
واليا تخلف كلهم يفقدونه
واشارك الجمهور بالحل ممنون
النجر حله والعرب يعرفونه
فهد المحمد الحزاب
الرس
***
يامرحبا وعداد مهلة مزون
ولغزك نحله لو تخفي عيونه
نجرٍ يدقونه هل الكيف بفنون
والمطحنة نست هل الكيف لونه
وحلت محل النجر من غير عربون
وقالت زمانه راح ياللي تبونه
مبارك محمد ال زنيغر
***
لغزك مرتب يامحمد وموزون
ساعة قريته ماطلبت العونه
هذاك صوت يقعد اللي ينامون
كيف العرب في قاعته يطحنونه
النجر كان بمجلس اللي يضيفون
ثم انقلب طاحونة يشترونه
حمود عيسى التميمي
حائل
***
بديت باللي له عباده يصلون
الواحد الي رحمته يرتجونه
من معجزاته للبشر كوّن الكون
من خشيته كل الملا يعبدونه
من بعد ذا حليت لغزٍ على هون
هذا النجر واهل الكرم يعرفونه
زايد بن ونيس الحازمي
طريف
***
ما احلى الربيع الزين للي يتمشون
بارض نظيفه زاهيات فنونه
واللغز حله كان يالربع تدرون
نجر تعدا يافتى الجود كونه
يللي كتبت اللغز للي يحلون
هذا جوابي علكم تنشرونه
فراس خليف الحربي
الرياض
***
دام الرجال لرفعة الدار يسعون
المجد لو طال الزمن يدركونه
مهما حصل في طبع الايام يرسون
لجل الوطن,,واسم الوطن يرفعونه
وعلى الاصالة من وفاهم يغارون
حتى النجر من طيبهم يحتمونه
فهد الجروان
الزلفي
***
ارفق علينا يامحمد على الهون
وشبك تجيب اللغز من هالنمونه
هذاك يالطيب له سنين مسجون
اللي اليا نادى النشامى يجونه
النجر وقته صار من دون في دون
راحت جماهيره وقفت ضعونه
راشد مرشد المسمى
***
النجر والمحماس مرمي ومركون
طبع الحضاره واهلها مايبونه
تبدل المذكور في رأس طاحون
من البطا والهجر وش صار لونه
اللي يبون الشي جاهز ومطحون
لو مايجيهم رزقهم مايجونه
محمد علي السالمي
رفحاء
***
اللغز يالموسى محكم ومازون
وحله يجي بالحال مالك مهونه
نجي الدلال اللي اهلها يهلون
كل العلوم الطايله يدركونه
جاله اهانه يوم بدل بطاحون
حتى اقرب الجيران مايسمعونه
سويد عقلا العنزي
الخرج
***
يامحمد الاحمد هلا بك وممنون
عداد ماهل المطر من مزونه
والحل واضح والمخاليق يدرون
ان النجر له ماضي يذكرونه
محمد البدر
الزلفي
***
يادنّ قلبي دن نجرٍ على الهون
لين الجبل ردد صداه بركونه
دنّه صبي بأشقر البن مفتون
قام يتفنن فيه واظهر فنونه
ماهوب بن بالطواحين مطحون
هذا جواب اللغز ياللي تبونه
زيد بن سعد بن جليغم
الرين
***
على الصعايب وكلّ الرب وتهون
اللي خلق هالكون قام بشؤونه
لو الفيافي كلها قدور وصحون
تفيض باسمان المعاني صحونه
ياشاعر معناك وافي وموزون
النجر شكله يالسنافي ولونه
محمد عبدالكريم الغزي
الزلفي
***
ابن دغيّم جاب له حل موزون
لمحمد اللي فالجزيرة فنونه
لغزك ترى حله ولافيه مطعون
النجر دنّه للعرب يسمعونه
ناصر سعد السهلي
الحفنة
***
يامحمد الموسى تذكرت وشلون
باللي نساه الناس لو هم يحبونه
ذكرتهم بالنجر يوم يدقون
الهيل والقهوه ومايطحنونه
فهد عبيد العارضي
***
يامرحبا باللي كتب لغز موزون
اعداد ماهلت سحايب مزونه
واعداد من ينزل ومنهم يشيلون
واعداد طير غردت في لحونه
واعداد منهم بالبسيطة يسيرون
واعداد من دق النجر يسمعونه
زيدان الحازمي
طريف
***
يامرحبا بك عد ماهلت امزون
وبلٍ تحدر من عوالي امزونه
محمد يريد الحل والحل مضمون
نجر يشيل الصوت تطرب لحونه
اللغز محكم بالتماثيل مأزون
شعر امنبت بالمعاني اكرونه
خليف الحربي
الرياض
***
يامرحبا واعداد ماهلت مزون
واصبح شخاتيره لنا يذكرونه
يامرحبا يالشاعر اللي له فنون
في لغزه اللي هيضتنا فنونه
والنجر لها لحين تراه مصيون
عند الرجال اللي تقدر لحونه
شاهر محسن الشيباني
حايل
***
بصفحة تراث الخير للحل تقرون
الصفحة اللي بالشعر يمدحونه
هذا النجر عنه اكثر الناس يدرون
جاكم جواب اللغز ياللي تبونه
محمد ناصر الزيدي