تَعْرِفْ علُومِ اللي تبي منْ مِمَاشِيه كِلٍّ مَعَ أشْبَاهه يِلَاق انْسجَامي

بيت الأسبوع
مجاراة لبيت الأمير الشاعر محمد الأحمد السديري حول اختيار الصديق الذي في صداقته النجاة والبيت يقول:
من قارب الأجرب بالأمراض يعديه
عدواه تسطي باللحم والعظامي
وقد كان الصدى من الشعراء:
حكمه وخذها والردي لا تماشيه
يرميك لو انك براس السنامي
خلك مع اللي ما يخالف مباديه
لو دارت الدنيا لقيته حزامي
وانا مع الوافي بدربه مخاويه
اهديله الخوه وزود احترامي
سعيّد العسوج
بيتٍ حكيمٍ كتْب الأشْعَارِ تَرْوِيه
منْ قُول بُو زِيدٍ رفيع المقامي
تَعْرِفْ علُومِ اللي تبي منْ مِمَاشِيه
كِلٍّ مَعَ أشْبَاهه يِلَاقي انْسجَامي
النّاسِ تَذْكِر كلّ حَيٍّ بِمَا فيه
احذرْ تجِي درْبِ الْخَطا والْمَلَامي
مِنْ رافقِ البايرْ تجِيهِ المشَارِيه
وِيْصيرِ في شبْهَهْ ووَضْعِ اتّهَامي
صاحبْ كريم الطّبْع تَكْسَبْ مبَاديه
أقّلّ ما تأخِذْ ثَنَا واحْتِرامي
رِفْقَةْ خَوِيٍّ يمْتِدَحْ عنْدِ طاريه
ذخْرٍ كبيرٍ بالشّدايد حِزَامي
ناصر جمعان آل عوض- وادي الدواسر
خلك بعيد و لا تقرب حواليه
ولا ترى يركب عليك الملامي
واللي دروب الخنبقة من مماشيه
ابعد عن ادياره وخلك عصامي
خل الرفاقة كان دربه حراويه
خلك رفيق مع رفيع الَمقامي
على الرشيد - رياض الخبراء
ومن صادق العقرب بالسم تكويه
يشقيه ليله والعين ما تنامي
وابعد من قاصر اليد لو كنت تغليه
يمناه تغدي بالشين والحطامي
ما يعطي شيٍ في القلب يغليه
لو طلبت منّه حبل الخطامي
صلاح المبطي - الخبر
ومن قارب الطيب على الحول يمديه
حاش المراجل بالفخر والسلامي
احرص على اللي بالوفا دوم يبديه
رجل المراجل والشهامه وسامي
وبالروح والغالي عن الشر يفديه
وهذا الرفيق اللي رفيع المقامي
واحذر من اللي ما يفيده و يجديه
هافي ضمير والفعايل كلامي
حمد عبدالله الوايلي - حوطة سدير
ونعتذر عن عدم نشر تسع مشاركات لوجود إشكالية في فتح بعض رسائل المشاركات
«بيت الأسبوع»
كتب بيت الأسبوع المقبل على طرق الهجيني الشاعر مشعل بن صنت العصيمي من الخرج ويقول:
العام مهوب مثل اليوم
يا نايم اصحى من فراشك
نستقبل صدى هذا البيت
خلال أربعة أيام من نشر البيت
على إيميل الصفحة:
rb-khozama@alriyadh.com