لا خاطبك خبل من الناس مطفوق خلك عزيز النفس وارفع مقامك

كان بيت الاسبوع الماضي من طرح الشاعر حمد عبدالله الوايلي من حوطة سدير في حكمة عبر هذا البيت:
لا خاطبك خبل من الناس مطفوق
خلك عزيز النفس وارفع مقامك
وكل الشكر لمتابعي هذه الزاوية ونخص بالشكر الشعراء الذين لهم البصمة الاولى في استمرارها من خلال مشاركاتهم وإبداعاتهم على مدى يربو على العشرين عاماً ونطمح في المزيد من المتابعة وإبداء الآراء التي من شأنها الرقي بمستوى هذه الزاوية الاجتماعية كما نود أن ننوه أن صدى البيت سوف يكون بيتا واحدا فقط بداية من الاسبوع القادم ليتجلى فيه الشاعر المبدع والذي يستطيع إيصال الفكرة من خلاله
وكان صدى بيت الاسبوع الماضي من الشعراء:
وابعد عن الأنذال واللي لهم بوق
مع قرب هذولا يقل احترامك
خلك مع اللي في مماشيه موثوق
اللي يحفظ السر وايضاً كلامك
ليت المراجل تنجلب داخل السوق
حتى تخير ما يناسب مرامك
علي الرشيد - رياض الخبراء
بين البشر دايم تجد واجدِ فْروق
ماهم سوى حتى ولو هم عمامك
أحدٍ مثال الطيب والجود والذوق
وأحدٍ بدرب الخبث والعيب لامك
لا يْصير صدرك للخطا حرز صندوق
سامح تعيش بْخير مرفوع هامك
ناصر جمعان آل عوض / وادي الدواسر
ياما تكلمنا مع الناس برفوق
اخاف من يوم يقل احترامك
لا تندفع يم الجماعات بالسوق
حدد مساراتك وقلل ملامك
الى طرى تمشي وتسلّم من العوق
حسّب خطياتك وثمن كلامك
عبدالله عبدالعزيز القديري - العطار
لاخاطبك خبل من الناس مطفوق
عَطّه من يمناك قبل سلامك
احكم على المطفوق باللون والذوق
ولايخترقك هيبتك ويخرق نظامك
العقل من الله ماهوب يباع بالسوق
ومطفق الناس تحرق خيامك
شجعان العتيبي - الرياض
الخبل خبلٍ لو تبي ترفعه فوق
دايم مرامه مايوافق مرامك
النذل نذل به خساسه وبه بوق
مايرتكي لك لاتوخر حزامك
خلك عزيز وكل مطرود ملحوق
وابعد عن الانذال قايم مقامك
زبن مقبل العنزي- بريدة
كثر المجادل والحكي ماله أُفوق
الصمت حكمه والادب في كلامك
لا شفت لك هيت ٍ به القلب مفتوق
خله بفاله واحّسبه من حشامك
وان صد خله في طريقه بلا عوق
ما احّد ٍ بقايل ليه وألا علامك
مشعل بن صنت العصيمي/الخرج
قل له سلام وكل مطرود ملحوق
تكسب جميل يزيد جد احترامك
واللي بليا مال لا يدخل السوق
خله لاصار انه ماثمن كلامك
عن ماحدث لاعله يعود ويروق
وقل قابل ن عذرك وياصل سلامك
صالح محمد محارب البشري - الرياض
العقل نعمه جارك الله من العوق
تلقى من التقدير تلقى احترامك
ولا شفت لك مطفوق قابله برفوق
ترى نظامه ما يطابق نظامك
ولاجاك هرجه من الشخص ما تلوق
لاتقابله بالعنف واوزن كلامك
محمد بن عبد العزيز الخنيفر-اشيقر
بعض البشر يرمي كلا من بلا ذوق
لاجاب كلمه ما يحقق مرامك
تركه هو المطلوب لا صار مطفوق
تركه أخير كان تطلب سلامك
هذا هشيم ن ما يعرف الدرب وحقوق
ياصاحبي احذر تلقيه اهتمامك
نصيحة خذها يا صاحب الذوق
يقوله اللي كم يقدر مقامك
ريان بن محمد الخنيفر -اشيقر
بيت الاسبوع
أرسل للصفحة الاخ منصور شليويح العنزي بيتاً للشاعر سعد بن جدلان ويأمل مجاراته من الشعراء والبيت يقول:
يدك لامدت وفا لاتحرا وش تجيب
كان جاتك سالمه حب يدك وخشها
نستقبل صدى هذا البيت ببيت واحد فقط يدور حول هذا الموضوع وخلال اربعة ايام من نشر البيت
ويفضل الإرسال عبر الإيميل:
rb-khozama@alriyadh.com
ونرحب بطرح بيت الأسبوع