سبحان ربٍّ ثبت الأرض بجبال واحصى معالم برها مع بحرها

سبحان من ابدع بصنعه بهالكون
حط الرواسي تثبت الارض باوتاد
فالغاشيه مذكور وانتم تعرفون
من عظم شانه ما لها حصر وعداد
عوامل التعريه ما حطته دون
شامخ كبر ما لان عزمه ولا باد
ما هزته ريح الزوابع ولا سنون
بقعا تحداها تسبب له جهاد
سعود عبدالعزيز الهزاع - نعام
الجبال اللي تجلّت حدّها غرب القصيم
فيها من كل العجب لانظرها اللي يشوف
والمصور صور الصوره على وضع السليم
يا قطن سبحانك الخالق في أحسن وصوف
مكور هالكون كله جل جلالك يا عظيم
حمد عبدالله الوايلي - حوطة سدير
سبحان ربٍّ ثبت الأرض بجبال
واحصى معالم برها مع بحرها
ناسٍ تزور المنتزه خص إلى سال
شيٍ يسر النفس يبعد كدرها
واللي رقوا فوق الجبل فالهم فال
بانت صورهم بالغير او نشرها
علي الرشيد - رياض الخبراء
متميِّزه في كل شيٍ يا قِطن
برضك واهلك مِع جبالك والأصاله
امرؤ القيس اِبجمالك إنْشِطن
واصِفِك بابيات تكفي للدَّلالَه
ما يَبْخصِك يا كود مِن أرضك قِطَنْ
ضِلعٍ أشَم ومدْهلٍ لَأهْل الجماله
عزيزةٍ في موطنٍ أغلى وطن
ارض القداسه والفخر وارض الجزاله
سعو عائش الحربي
سبحان منهو كوّن الكون يا ناس
أرسى الجبال وزينه بالطبيعه
الواحه اللي شوفها يبعد اليأس
بين الطعوس وبالصحارى الوسيعه
يزورها اللي همهم كيفة الرأس
يكحل عيونه بالمناظر بديعه
ببلادنا اللي كنها جوهر ألماس
بين الدول دايم براس الطليعه
خالد ناصر المخيمر - روضة سدير
صورة فريدة ما لها أشباه يا ناس
وسط الطبيعه بين السما والصحاري
جبال كن اللون يشبه للألماس
لوحة ثمينه زينها بالبراري
سطام المسردي - الرياض
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد (عدسة / محمد اليوسفي)