صورة عدد وسط الجريده يشوقي منظر قديم ويعجب اللي يشوفون واحد معه طاسه .. والآخر عذوقي تمرٍ من النخل البكاير يخرفون للبيت ماهم جالبينه لسوقي لا جاهم الضيف المسيّر يحطون سعود مطرب العتيبي – الدوادمي فلاح وخوه وبستان يسعى به محش للحش والكر يرقى به مخرف وزنبيل حق التمر لا جابه وغضارة الشرب فوق الرأس لحبابه عبد العزيز الصالح - القصب ذكرى من الماضي الجميل من جيل معدنهم ذهب جيلٍ عشق غرس النخيل رغم الشقى رغم التعب إمنِ الفجر حتَّى الأصيل كلٍّ بكدِّه يِكْتِسب ما همّهم ظلٍّ ظليل ولا فكَّروا بعالي الرتب ولا انشغلوا بقالٍ وقيل الرزق يبغى له سبب ما ودِّي أشرح ثمَّ أطيل أنا اشتهيت أكل الرطب ناصر جمعان آل عوض - وادي الدواسر هات القدوع وقرّب الزبد يا خوك واوصيك بالدله وزين السواليف واذا تقهوى وانبسط ثم نادوك قدم له الفطحه وناد المواليف هذي سلوم الجد والعم وابوك خذها ولاتسمع كلام الملاقيف هذا الفخر والعز والعلم لاجوك اهل الركايب مفردين ومراديف عبد الكريم النغيمشي - لوذة لله درّ اللي خرف ثم جابه جابه على راسه وربي يعينه العذق في المخرف وتمره غدابه ومنصف في طاسه عارفينه وقت الخراف مجهزين حسابه كرّ ومخرف والمحش بيمينه يا زينها نخيل تعلت بغابه لا شافها قلبي يبيّح كنينه لا واهني اللي بالنخل حيابه شيٍ عطاه الله يشوفه بعينه عثمان إبراهيم الرشيد - الرياض دنيا العجب مالك عليها ملامه يعاير الميت في قبره بها الحي الحل يغني صاحبه عن حرامه والعيب يخزي الرجل لو انه شوي والجود والمعروف ماله علامه وطيب الفعل في جاحده يعتبر سي ولا يغْرِيِّك منهو كثيرٍ كلامه تراه لا يدسم ولا يارد المي ولامن خلت من رجل حب الكرامه ماظنتي انه كاسب اف دنيته شي ماجد محمد اللهيب - القويعية صورة جميلة بس جابت لي أحزان من ثلث قرنٍ فات ذولا فلاليح معه قدوعٍ فالسطل وبمتنه بطان جذّو لهم عذقٍ واظنه مطاويح ومعهم فراسة فالنخل لوه عيدان يرقى البواسق يصرمه كنه الريح سعود عبدالعزيز الهزاع - نعام جينا وخرّفنا وما نبي اليوم خذناه لعيالنا وأيضا الرفاقة والأصحاب وهذا هو المطلوب واللي نتمناه ذي نعمةٍ يا ناس من رب الأرباب لكن نخلنا طوال وبالكر نرقاه ولا همنا كثر الشقا وهم الأتعاب محمد عبدالعزيز الخنيفر - اشيقر رجال المواقف والعزايم لهم دور كدوا على طول الزمن بالعزيمه شافوا من اعسار الدهر والشقا جور ثم شمّروا ذرعانهم في هميمه والكل منهم ثابتٍ صامد السور من خير ارضه يعتبرها غنيمه هذي حياة اللي لهم باع وشبور شوفوا مواقفهم تراها عظيمه حمد عبدالله الوايلي - حوطة سدير حي الزمان اللي مضى ياهل العرف حيّه وحي رجاله اللي مشوا به من فوق راس الرجل عذقين بمخرف وآخر معه كرٍ بعد ما رقوا به شغل الفلاحه يا جماعة يشرف اسأل عنه شيابنا اللي عاشوا به خالد ناصر المخيمر - روضة سدير لا جيت أنا الحيطان يرتاح بالي ياما يذكرني عصورٍ قديمه نخيلنا في قمّةٍ بالعلالي والخير واجد جعل ربي يديمه أنا وأخويه بالتعب ما نبالي في خير ونعمة مع حياةٍ كريمه ريان محمد الخنيفر نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى: [email protected] أو الفاكس رقم: 0114871070 ويا هلا.. صورة العدد السابق
