المنظر اللي في الخزامى نشوفه منظر شبابٍ جالسين على حدّ

في جلسةٍ حلوة على روس الاجبال
ثلاثة ارجال قروم حلاحيل
وباسفل الوادي بحيرة بها فال
الماء تجمّع يوم ينزل بها السيل
الناس فرحانة صدى الخير مازال
والله حافظهم عن الزيغ والميل
علي الرشيد - رياض الخبراء
جلسة شباب بغار في ضلع بطويق
اختاروا الجلسة بعيدٍ عن الدار
ترويح نفس من المدن صابها الضيق
خصٍ عقب ما سيّل الوادي أمطار
بين الجبال النايفه .. والشواهيق
زلته ملاها سيل من السفح محذار
يا رب يا مسقي جميع المخلايق
تعل رجعٍ ترتوي منه الابيار
سعود عبدالعزيز الهزاع - نعام
المنظر اللي في الخزامى نشوفه
منظر شبابٍ جالسين على حدّ
جا له طويل وحدّر الماء بجوفه
عقب الغدير اللي توالا من المدّ
من المطر يا بعد عمقه ولوفه
وابنذر اللي همهم صورة العدّ
بين الجبال وبين مجرى وطوفه
يا اولاد حذرا لا تزلون من جدّ
ترى غلاكم عند اهلكم مروفه
والعمر في لحظه يزول وينهدّ
حمد عبدالله الوايلي - حوطة سدير
سبحان منهو كون الكون يا ناس
ارسى الجبال وزينه بالطبيعه
الواحه اللي شو فها يبعد الياس
بين الطعوس وسط أرضٍ وسيعه
يزورها اللي همهم كيفة الراس
يكحل عيونه بالمناظر بديعه
ببلادنا اللي كنز دايم وألماس
وشعارها دايم براس الطليعه
خالد ناصر المخيمر - روضة سدير
شعباننا نحمد الله دوم مليانه
شفنا النعم من كثرها اشكال والواني
من فضل ربي عظيم الشان سبحانه
والحمد لله ربيع بكل الاوطاني
واليوم اشوف العرب بالحيل شفقانه
وكل شي تحقق لهم والكل فرحاني
وايضا هل الذود بالخيرات فرحانه
اشبع حلاله جابه وسط ريضاني
محمد عبدالعزيز الخنيفر - أشيقر
صورة بها الذّكا .. والمهاره
وتحليلها كلٍ على حسب مفهومه
ميٍ تجمّع وسط شبه المغاره
من هو بلش في فهمها ما نلومه
وخلاّه نور الشمس شبه المحاره
ورسم عليه الجو أحلى غيومه
كم ينبجس من ميّ وسط الحجاره
وأرضٍ محل لا ربّعت بان مكتومه
بالمملكة كلٍ يرى وين ما ساره
معلومةٍ جدّد بها دارس علومه
ما بين صحصحٍ بالبر كله خضاره
سج القدم بجبال وسهول وحزومه
سعود عائش الحربي - جدة
الأودية يا زينها لا جا الربيع
العشب في وسطها وجواً حسين
من شافها يلقى السعد وصدره وسيع
شوفوا البشر من كل فجٍ حاضرين
حافظ على نفسك وخلك مطيع
لاتروح روحك يا عساكم سالمين
ريان بن محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق