صوت الصورة

موتر البرّان والله خابرينه
جيب ما هوب الصغيره يالسنافي
طلعت المكشات ماهي كالمدينه
ذي تغاريز .. وتضاريس .. وفيافي
من نزل فيها عسى ربي يعينه
شاف شي ٍ في حياته ما يشافي
عبدالله بن عبود السهلي- تبوك
البرِّ زينٍ يبهج العين والنفس
بين الرمال وبين عشب الربيعي
لكن يبي له موترٍ يقهر الطعس
وناسٍ تعرف المنطقه ما تضيعي
ناصر بن جمعان آل عوض - وادي الدواسر
ياللي على موترك هاقي به الطيب
في ديرةٍ جردا .. وبين الصحاري
وسط الصحاري ماعن الجيب تجنيب
والحر يفرق عن طيور الخضاري
علي سليمان العازمي
يا زين علوم البر وأهل المكاشيت
بأرضٍ نفود والوبل قد وطاها
عبا من البنزين..وشيّك على الزيت
مير التواير ليت خفف هواها
بالطعس يركس كل ما اقبلت واقفيت
مثل الذهب حبات رملٍ تزاها
سعد الحماد - روضة سدير
العين تنظر للعرب تطلب إسعاف
يالله عسى الأجواد يجون فزعه
موتر صغير والرمل مخطر وجاف
والحيل قاصر لو يزيدون سبعه
حمد عبدالله الوايلي - حوطة سدير
الشباب اللي يدزون الصغيره
حسبوها الجيب أبو زرارٍ خفيه
عزتي للي هقاويه تديره
تهلكه في البر ويصير الضحيه
لا تعوّدها ترى الصحرا خطيره
شغلكم هذا تراه أكبر خطيه
مبارك محمد بن طرجم – وادي الدواسر
أدفع بقوّه دام عندك عزيمه
ولا تخلي في العزايم تقاصير
سيارتك في البر يمكن قديمه
خايف تخربها أو تقطع السير
ممدوح سالم القفيل – الخفجي
وين الله جابك للتغاريز يا زول
خل الطعوس وروّح يم الحديقه
دوّر ظلالٍ زين وأرتح على طول
مالك ومال اللي ما تقدر تطيقه
ممشاك في برن به الوضع مجهول
عقب الكسل ما عاد تجلس دقيقه
غنام مسعود القريني – نعام
إذا نويتوا على المكشات
الجيب خلّه خويٍ لك
الكامري ما بها فزعات
والجيب مركب واضمن لك
محمد بن فهد الجلعود – سميراء
يا طالعٍ للبر بسياره صغيره
فكر ترى البر تغريز وأشجار
لا صار معك الربع وأهل البصيره
دفوا لك الموتر ولو جاهم غبار
عبدالله علي الحوشاني – الرياض
ياما حلا السجّات برضٍ عذيه
وسيارة الرفع الرباعي طراته
ما كان تطلب دفّ ربعك شويه
وقتٍ جميل يضيع بالدف لحظاته
سعود عائش الحربي - القاهرة
الدرب ماهو مزفلت لك يا بو حميد
حتى ولو دفوك شفه متعلق
اصبر يجرك سائق لسيد البيد
جيب ولو تبغى الجبال يتسلق
سعود عبدالعزيز الهزاع - نعام
هذي دروب الجيب ما أنت بهلٍ له
يا راعي السودا تعلقت بالقشع
ما همتك تلعب بها لاجل شله
ولا غرزت تقول تكفون يالربع
ولقيمة الموتر ما حسّبت لِلّه
وأكيد ما تدفع من القسط لو سُبع
عبدالكريم الراشد التميمي - الغزالة
صورة العدد بعدسة الزميل عليان العليان
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
،