بيت الشَّعر زاده حلى بنت الحلال الطفلة اللي اتقنت خضّ الصميل

يا بنت ياللي تخضين الصميل
على القديم وكلها متواسيه
يا ما تروى منه صبيان السليل
بأيام راحت كلبوها قاسيه
حمد عبدالله الوايلي - حوطة سدير
خَضّ اللبَنْ يا بِنت عاده قدِيمه
في قِربِةٍ من جِلد كان اسمَهَا اسقا
في ماضِيٍ كانت ظروفه أليمه
الزّاد فيها كان بالكاد يلقا
ناصر جمعان آل عوض - وادي الدواسر
بيدٍ عسى ما تجيها النّار
خضّت صميله بقناره
عصر البساطة وفيه أسرار
كلٍ معيشته في داره
أحمد سليمان الخزيم - الرياض
خضّ اللبن للبيض عادة قديمه
وسط السقا والزبد عند النهايه
الغالية قامت بجد وعزيمه
امدربة للشغل عرف وكفايه
على الرشيد - رياض الخبراء
بيت الشَّعر زاده حلى بنت الحلال
الطفله اللي اتقنت خضّ الصميل
وِيا حلو نصبه بالخلا بين التلال
برضٍ ربيع كل ما فِيهَا جِمِيل
سعود عائش الحربي - جدة
قنّارة الصميل ماهيب تخفى
عاصرتها يوم العرب له يخضون
يوم الصبوح وشربته ما تجفى
فيه الغبوق وشربته ليل تدرون
خليف فهيد الحربي - الرياض
أنا أشهد إن البنت قرمه ونشميّه
خضّت لبنها في شديد الحراره
لاجل ضيوف قادمين وطرقيّه
هذي الشهامه والكرم هو شعاره
محمد عبدالعزيز الخنيفر - أشيقر
دام السعن مرفوع تحت العمودي
ترفقي يا بنت لا تطرحينه
هزيه ليننه يا بنتي يجودي
لين الجميد من البن تطلعينه
منير مذكر العضياني
مترامية لطراف يا ذا البلادي
الوضع واحد والأسامي كثيره
يقلون شكوة واللبن صار قادي
وقالوا صميل اتهزها بنت ديره
محمد عبدالله الشهري - أبها
يا بنت همي والحراره شديده
خضّي لبنك وعجلي لاتونين
الخير واجد جعل ربي يزيده
وانتي ضيوفك قربوا لا تغفلين
ريان محمد الخنيفر
خضّي اللبن يا الغالية انعشي الروح
الضيف غالي من رجالٍ كريمين
خليك ظفره أجعلي البال مشروح
ترى الكرم طبع السعودي من سنين
خالد ناصر المخيمر - روضة سدير
نرحب بمشاركاتكم الشِّعرية
على ألا تتجاوز بيتين، وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق