ذكرى التراث اللي على عهد الأجداد المبخرة.. والبنت ملبوسها ذوق

إعداد - بكر هذال
بنتٍ تطالع مدخنٍ طول مترين
رمز الضيافة عند راعٍ المواجيب
يستقبل الضيفان به جاويٍ زين
من مصدره ملقوط ما شابه العيب
ريحه يدل اللي مضيّع عناوين
بيت المضُيف يوصله ريحة الطيب
ليا جا على جمرٍ غداله تلاوين
ازرق يعتّم لمبّة البيت وتغيب
سعود عبدالعزيز الهزاع - نعام
الكرم.. والطيب من طبع الكرام
والمكارم شامله حتى الحريم
بنتنا اللي شكلها بدر التمام
ماسكه مدخن ولها فعلٍ عظيم
بالمنخنق اللي شوفته تجلي العتام
وثوب الزري مطرّزٍ أحرسها ياكريم
مفخره لمنهو سعودي يا سلام
فيها الأصاله فيها الكرم من قديم
خالد ناصر المخيمر - روضة سدير
ذكرى التراث اللي على عهد الأجداد
المبخرة .. والبنت ملبوسها ذوق
مع لذّة الماضي يعيشون الأحفاد
شيٍ يشوفه من مشى داخل السوق
في ماضيٍ مرّت سنيات إشداد
والناس فيها بين سابق.. وملحوق
علي الرشيد - رياض الخبراء
المبخرة.. والبنت.. واللبس.. والعود
حبّها متجددٍ كنّه اليوم
صوره تقول بصوت واضح ومشهود
أنا الجذور وعادة أجداد.. وسلوم
حب التراث بيوم عن يوم في زود
ما دام يرعاه النشاما على الدوم
سعود عائش الحربي - جدة
من التراث اليوم شوفوا الجميله
لباسها شوفوه من عصر الاجداد
انا أشهد ان البنت هذي أصيله
تحيي تراث علّه اليوم يزداد
يجدد الماضي .. ومابه مثيله
ترى التراث اليوم عزّه مع اسعاد
يا ربعنا يا أهل العلوم الجليله
نبرز تراث آبائنا قدم الاشهاد
محمد عبدالعزيز الخنيفر - أشيقر
يا طول طول المبخرة يا جماعه
اطول من البنت الصغيره على طول
مدري كرم والاتمشي بضاعه
والا بمحفل في تراثٍ على الحول
رمز الترف رمز الكرم .. والشجاعه
ماحاشها اللي يكرم الضيف بالفول
واللي صنعها فايقٍ في البراعه
وأظن سعر البيع ماهوب معقول
حمد عبدالله الوايلي - حوطة سدير
ياما حلا شوفة الطفلّه
في لبسها اللي مجمّلها
ولباسها اليوم ما مثلّه
رسالة الطيب تحملها
تراث الاجداد م انملّه
هذي رساله نوصلها
لكل جيلٍ وتاصل له
حذاري اليوم يهملها
ريان محمد الخنيفر
يالله يا مجيب الدعاء إنك تعين
أكرم ضيفٍ لفاني عقب العصر
دلّةٍ بالشمال وفنجال قهوة باليمين
ما اطلب غير رضاك ياربي والأجر
علي عبدالله العمودي
هذا تراث أجداد بالقلب محفوظ
رمز العرب.. رمز الكرم.. والأصاله
واللي بحب الطيب ينا ناس محظوظ
يفيد نفسه كاسبٍ للجماله
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق