صوت الصورة

يا بنت دقّي النّجر دقيه
أتراثنا لازم تعرفونه
الثوب شعبي ونقشه فيه
زواركم دوم يشوفونه
عبدالكريم عبدالرحمن السلّوم - القرائن
بنتين في سن الزهور المباكير
ما احلا حلاهم يوم لبسن قناعي
الزي صافي اللون رهن المخاسير
زيٍ لبوسه راح وقت المراعي
وأشوف النجر يشرح صدور المسافير
يا زين صوته يا بكر في شراعي
تراث ماضي له رجال مناعير
اقفوا ولكن ذكرهم ما يباعي
حمد عبدالله الوايلي - حوطة سدير
يا وردتين جالسات سويّه
باللبس حلواتٍ وهن جالساتي
لبسٍ قديم وفي سعادة قويّه
أنا اشهد ان الزين بالغالياتي
الكل فيه الطيب ودايم وفيّه
على تراث أجدادكن وافياتي
هذي حياةٍ يا عساها هنيّه
عسى السعادة دايمه والهناتي
محمد عبدالعزيز الخنيفر - أشيقر
يا زين منظر ذي النجر والبنيات
صوره من الماروث متوقف سنين
من لبسهن عرفتهن من الامارات
بطقمٍ براقع موزعه بين بنتين
تذكير للماضي على فايتٍ فات
تلقى حنين الشوق فيه المسنين
سعود عبدالعزيز الهزاع - نعام
يوم البداوه ونجرٍ فات
والقهوه اللي نسويها
اشوف نجرٍ مع البنات
وحده تدقه بياديها
البنت منهن تسوى ماءات
يا عنك ما تلوي علابيها
حياة نكد وكلش مات
ما باقيٍ كود نشريها
النفس قشر وبها لفات
والعالم الله بخوافيها
خليف فهيد الحربي - الرياض
متراكياتٍ والملابس تراثي
والنجر يدوي صوته اليوم مسموع
ياما حلا الصوره وبعده ثلاثي
زولٍ جليجي ممتع غاية الروع
ترتيبهن واضح وترتيب أثاثي
مكانهن معروف مابينهن بوع
عبدالمحسن محمد المحيسن - رياض الخبراء
بنتين كل وحدة تقول عندي الزود
في زينهن في لبسهن في حلاهن
يما حلا البراقع والمخانق سود
عيني عليهن حسن ربي كساهن
يتعلمن ورث القديمين من جدود
دق النجر تجهيز طبخة عشاهن
هذي البنات اللي لهن بالحياة فود
يشفن غليل اللي في بيته رباهن
خالد ناصر المخيمر - روضة سدير
ياليت وقتٍ مضى ينعاد
بعادات جزله ومشكوره
اللبس والنجر والمقعاد
وبنتين بثياب مستوره
أشيا من عادة الأجداد
تنحب في وسط الصوره
سعود عائش الحربي - الرياض
أشوف اللبس زين يذكر به الجدات
لباس يسر القلب وفي منظره غالي
تراثٍ قديم ومن تلبسه سنعات
عسى الرب يهديهن طلبناك يالوالي
وأشوف النجر رنيه يجيب أصوات
من أجل الضيوف اللي على الدار زلفالي
علينا من الماضي ونحيي زمانٍ فات
به نفوس محبوبة دوام على البالي
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق