صوت الصورة

هات الصميل وصب وسط الغضاره
من لبن معزاك محلى مذاقه
واللبن والتمر قبل الحضاره
وجبة الأجداد تعطيك طاقه
وعند العرب تقديمها به إشاره
لحسن الضيافه والكرم .. والعراقه
وكم بعض أكلات فيها خساره
وبينها وأمراض توجد علاقه
سعود عائش الحربي - جدة
يا وليدي اشرب من الرايب
صميل من يوم ما جيناه
ضبطت شغله وأنا شايب
ومن البقاله فلا بعناه
من بكرتي سكر وطايب
من ذاق طعمه نشب عطناه
لو يشربه طافي وعايب
ردت اموره ورجع مسناه
عبدالكريم النغيمشي - لوذة
يا شايب الرحمن بالله صبّه
صبّه عسى يمناك تعطى السلامه
صب اللبن ترى مذاقه نحبّه
من الصميل اللي موثق كمامه
يا زين جوه لا تنسم مهبّه
خوة خوين ما تردا مقامه
والوسم بادي يوم حله ونبّه
اصبر شوي ثم تبصر علامه
حمد عبدالله الوايلي - حوطة سدير
لا ربعت دار الفخر يكثر الخير
وأهل الحلال نشوفها في سعاده
تلقى اللبن ومزهبٍ للمسايير
هذي طبيعة للنشامى وعاده
الضيف غالي له محبة وتقدير
يلقى الحليب مجهزٍ هو مراده
وتلقى به الصملان دايم مزابير
من خير ربي دايم في زياده
محمد عبدالعزيز الخنيفر- أشيقر
يا زين صبّ اللبن زيناه
وصميل الجلد.. والطاسه
أجدادنا شغلهم شفناه
كلٍ يعبّر عن احساسه
ضيفه يحطه على يمناه
والكل يجلس مع اجناسه
عبدالكريم عبدالرحمن السلّوم - القرائن
امل الغضاره من حليبٍ من الضان
مخضوض يفصل زبدته عن حليبه
بصميل مدبوغٍ من جلود خرفان
ما فيه بيت الا هله تعتنيبه
يرفع على سباج يعلق بمحجان
تعبيه وتفضيه رقبةٍ رطيبه
مخزن حليب العنز لبدواً وحضران
راع المنايح لازم انه يجيبه
سعود عبدالعزيز الهزاع - نعام
يا زين جوّي مع المرباع
بأرضٍ بها السيل غاطيها
مع ربعنا طيبين اطباع
وصميلانا الخير ماليها
من فضل رب الحلال اشباع
بالحيل مسرور راعيها
وسوالفٍ كلها إبداع
وراع القصص فيه يرويها
ريان محمد الخنيفر
يا زين مرباع البداوه .. ومحلاه
وقت الربيع يزين حلو اللبن ويفيد
وشوف الصميل وزايد الزبد يملاه
يفرح به المشتاق ويصب ويزيد
بشائر القحطاني - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com ويا هلا..
صورة العدد السابق