صوت الصورة

من حبتي للنوق حبيت خشتك
أغلى حلالٍ للعرب ينعناله
يا ناقتي تملى شعوري محبتك
بيني وبينك ذكريات وجماله
عبدالمحسن بن محمد الجريسي - الرياض
العود حب الناقه أم أحوار
يا زينها سبحان خالقها
الناقه اللي تكرم الخطار
واجب علينا اليوم نكرمها
رائد بن مناحي بن مسعد - القرين
يا والله اللي بلي في حب ذا الناقه
ما عاد ودّه بذا الدنيا يفارقها
محداً يلومه مادام إن الولع ساقه
كلٍ بما تشتهي نفسه معلقها
غنام مسعود القريني - نعام
صورة العدد الماضي
يا مقبّل الخلفه ترى ما أنت مليوم
لأجل الحليب اللي بيمناك منها
اشرب عسها بالهنى دايم الدوم
واشكر مذللها وجود رسنها
مشاري الغنام - ثادق
عند الابل انسى زحام المدينه
في عبلتن ماطبها كل دواج
وطاسة حليبٍ كلكم خابرينه
حليب منها بذمتي انه علاج
مصلح بن تركي الروقي - الصالحية
البكره اللي عانقت راعي الذود
صوره جميله للمشاهد تحيّر
لحظة حلبها ودّع البكره العود
وقت ضحويه يمكن انه يسيّر
عبدالكريم إبراهيم بن خزيّم - البكيرية
الذود راعيها يا زين المجاوير
الشايب اللي من الهم خالي
فيا زين شوف الابل حزة عصير
وشرب الحليب اللي من الطعم حالي
سعيد فلاح الواهبي - بيشة
دامت محبه والعلاقة قديمه
والكل صابر في مناخ وتضاريس
تسقيه صافي والموارد عديمه
وسط الصحاري كنها وسط باريس
سعد الحماد - روضة سدير
الناقه اللي غدت ميلاف
وصاحبه معتني فيها
قدم الخلايق و منهو شاف
يبوسها ثم يثنيها
محمد صالح الأطرش - رياض الخبراء
يابو شنب قبلتها من غلاها
حليبها أحلى من عذيات الاشراب
داجت وفاجت والكلا من فلاها
اشرب هنا ثم شرب أصحاب وأقراب
حمد عبدا لله الوايلي - حوطة سدير
يا ناقتي بوسه على الخد تكفين
بوسة وليفٍ عاشقٍ هايم فيك
اشرب حليب الأم بالعمر عامين
وأنتي حليبك اشربه دوم وأغليك
عبدالكريم النغيمشي - الربيعية
ذقت الحليب وما تمالكت نفسي
قبّلت خدّك يا بعد كل مالي
وين أنت ياللي سهمتك شرب ببسي
فرّق وشوف الزين بين الحلالي
خالد بن ناصر المخيمر - روضة سدير
محبة البل لنا هوايه
الله عطانا محبتها
صارت وسيله لنا وغايه
حليبها حلواً وخشتها
زبن مقبل العنزي - بريدة
ماهمني من ينتقد دامي أموت
في البكرة اللي شوفها هو علاجي
امولعن فيها كما ولعت نوت
في ماضي الأيام قلب العواجي
سرور بن محمد بن حنيان - المجمعة
أحب الصبوح اللي على فكة الريق
بجواً يسر القلب والعشب غاطيه
ووسط البلد يا ناس والله ماطيق
أحب البراري اعشقه في أراضيه
ريان محمد الخنيفر - الرياض
نرحب بمشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية (صوت الصورة)
ونستقبل الصور الهادفة والطريفة .. ويا هلا بتواصلكم