حمامةٍ أفلتت من بين قبضاتك هذي هي أقدارها والرعب ساكنها

يا طير يا فارد جناحك ومشتاق
عينك على زين الفيافي تشوقك
لك هيبةٍ في شوفتك بعد الاشراق
ووقت الهداد ما فيه شيٍ يعوقك
يا فرحة القناص في وقت الاطلاق
صيد الحباري صار ابسط حقوقك
بأرضٍ خلا متخالطه كل الأوراق
ما فيها احد من الجوارح يفوقك
خالد ناصر المخيمر - روضة سدير
يا طير هلّ الربيع وجات هدّاتك
أفرح كفوفٍ تحبّك تنطلق منّها
حمامةٍ أفلتت من بين قبضاتك
هذي هي أقدارها والرعب ساكنّها
والخرب يا طير صيداتك وغاياتك
شيمتك رمز السلامة تبتعد عنّها
يا طير يكفيك صيتٍ منبعه ذاتك
ووصايفٍ ينشد الصقار احاسنّها
ويا ابرق الريش ما هذي بصيداتك
إلاّ إذا كان تدريبك تضمنّها
ويا برّْ زانت مطاليعك وأوقاتك
عشاق صيدك بهذا الوقت ديدنّها
والصيد لاصار واحد من هواياتك
بالصيد خلك بخيصٍ في أماكنّها
سعود عائش الحربي - جدة
يا حمامه ارجعي جاك الصقر
الحذر مطلوب في وقت المطير
الصقر ما يرحمك لامن حضر
عوّدي لارضك ترى الموقف خطير
الصقر معروف يلزم بالحذر
لا لمحك الحرّ يبدا بالمسير
بنظرةٍ وحده ترى يبدا الخطر
الزمي ارضك ترى يومك عسير
محمد عبدالعزيز الخنيفر - أشيقر
حمامة فرّت ومالت عن الطير
والطير يلخصها وعينه بصيره
اهوى عليها باغين لقمته مير
ما بينهم غير المسافة قصيره
لكن في لحضه تغير له السير
راحت عليه وما توقت مسيره
ياللي قنيت الطير بصر على خير
خلّه على التدهيل ثم الكبيره
وضرّه بصيد مابه اليوم تفكير
حتى إلى هديت تلقى بشيره
حمد عبدالله الوايلي - حوطة سدير
ياللي تدرب طير تحتاج تدريب
ابدا بنفسك قبل وحشٍ تهدّه
السبق في رجليه فوق المخاليب
لطرد الحمامه في مسيره يلدّه
الطير يبغى من مضاله تجاريب
لا قيل صقارن معاهم تعدّه
مثل الذي للحرّ في فعله مصيب
يفهم اسلوبه بين هدّه .. وردّه
ان كان ذا فعلك فلا يلحقك عيب
اشوه على جمر السمر ثم تغدّه
سعود عبدالعزيز الهزاع - نعام
الحرّ لا من جاع محدٍ يردّه
في لمحةٍ بالعين يصدر قراره
عن صيدته ياصعب منهو يحدّه
لا شافها يجيبها بالجداره
يحقق مراده محدٍ يمدّه
الصيد طبعه دايمٍ هو شعاره
لا واهني القناص وقت يهدّه
الحرّ يضمن لانطلق كالشراره
ريان محمد الخنيفر
صورة العدد السابق
نرحب بمشاركاتكم الشعرية وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com