طير السعد له شوفةٍ تشرح البال لاطار في جو السماء يفرد الريش

الكف الأيسر شايلٍ أشقر الريش
ويمناه في الطاره يقدي مساره
هدّ الوحش يجيب لك طيب العيش
مخلاب رجله يشنكره في الحباره
كم مرةٍ يا طير طرت المطاريش
ما كان مشوارك بداخل غماره
تقطع دول من دون فيزه وتفتيش
مجنب طريق اللي عليه الخفاره
سعود عبدالعزيز الهزاع - نعام
الطير الأشقر هد ثم عاد ما صاد
عوّد على راعيه مهوي بلدّه
يبي سبوقه باغيٍ لقمة الزاد
هوّد ترى وقتك ولا فيه مدّه
الصيد قلّ وجوه اليوم ما جاد
إن طعتني لا تتعب الطير ردّه
ليت الزمان اللي رحل حق ينعاد
ونشوف صيدٍ فيه كثره وعدّه
حمد عبدالله الوايلي - حوطة سدير
أنا أشهد إن الحرّ يعجبك لا طار
حرٍّ على اسمه لا نوى له فريسه
ينقض على الصيده ولاهوب يحتار
لامن بدا المشوار بفكراً يقيسه
من صاحبه يلقى معزّه ومقدار
بين الطيور اليوم ما به جنيسه
محمد عبدالعزيز الخنيفر - أشيقر
طير السعد له شوفةٍ تشرح البال
لاطار في جو السماء يفرد الريش
يفرح به القناص ويشوش فالحال
لاجاب له صيده بوقت المغابيش
قلّ للمدرب يفتخر يرفع عقال
طيره من طيور الحرار المهاويش
وقت القنص ياصاحبي الناس تجتال
أيام الربيع اللي تجيب المطاريش
خالد ناصر المخيمر - روضة سدير
بين الصقر والرَّجل بسمة نجاح
اجتاز فيها الصقر دورات الإعداد
الطير عينٍ مع مخاليب وجناح
وباقي صفاتٍ يبخصه كل صياد
علاقة الصياد والطير مفتاح
خربٍ يعيض الكبد عن باقي الزاد
والولع دايم من قديمات وجداد
فيما مضى يومه على الرِّجل وشداد
سعود عائش الحربي - جدة
يا طير ياللي بالسماء معتلي فوق
أنا أشهد إن الحرّ ما فيه غيره
لامن طلع للجو يصطاد برفوق
دايم على الصيده يبني مسيره
والطير مايخفى على الصيد له شوق
واللي قنص لاشك يفرح بطيره
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق
Your browser does not support the video tag.