صوت الصورة

ياطير ياللي بالسما تدرج الحوم
لا واهنيك لاتضايقت ترقا
منته مثل من عاش بالضيق وإهموم
مجبور لو حزنه على الكبد عرقا
فهد بن عقيل الطويان - بريده
حراً حمى وكره على راس لولاح
لا حام له هام السما دار ما دار
حدر كما الإعصار حصاد الارواح
وادعا المحله دامره دم وكسار
صالح عبدالعزيز السويح - روضة سدير
بدري على وقت القنص والهدادي
والطير شلع بالسما والعلالي
عطنا خبر لا حان وسم البلادي
وإنجهز العده وجيب يلالي
عبدالرحمن بن منصور التركي - البكيرية
توكل على الرحمن والرزق مضمون
مثل ما رزق طيراً وهو هالك جوع
والحر ما ياكل نسوره بماعون
إلا بمنقاراً سنين تقل كوع
سعود بن عبدالعزيز الهزاع - نعام
يا طير يافارد الجنحان
في جوها السما العالي
أكيد تبحث عشا الورعان
والكل مثلك له أعيالي
عبدالكريم بن عبدالرحمن السلوم - القرائن
هب البراد وزان وقت المقانيص
والطير روح بالجناحين يومي
وطير الرهو قضوا عليه (السناعيس)
بديار حائل كوم من فوق كومي
زبن مقبل العنزي - بريدة
يا طير عطني جناحينك
وفضاوك الواسع العالي
فالسر ما بيني وبينك
ما شفت بالأرض من حالي
سعود عائش التميمي الحربي - جدة
فل الجناح وطير مع هبة الريح
وأترك أهموم الناس ما هي مفيده
دور على رزقك من الجوف للسيح
وأحذر من الصياد يسبقك صيده
خالد بن ناصر المخيمر - روضة سدير
يا طير اشوفك الحوم ياطير
تبي الفريسه وروح الوقت بافلاس
والحر رد وقال من هالصقاقير
أهل البنادق خلو الفكر ينحاس
محمد بن عبدالعزيز الخنيفر - أشيقر
يا طير ياللي ينفض الريش ويطير
طيراً على صيد الحباري عزومي
أنا أشهد إنك من مناة الصقاقير
حراً ينومس في نهار اللزومي
فهد مطر المخلفي - قصر ابن عقيل
طير السعد يبحث عن الرزق بدري
مهوب يرقد لين رزقه يفوته
شبابنا ليتك تفكر وتدري
من حرك الأطراف ياتيه قوته
علي الغنام - ثادق
يا طير بشرني وأبشرك ياطير
عان الحباري هاجرن للحمادي
هب البراد وغردن العصافير
وهد الفحل في مقرعات التوادي
بجاد بن شجعان العتيبي - الرياض
الطير غادي والمواري سبوقه
يا حسرة الصقار يا كبر غله
ما فيه صيد ولا بجو يروقه
يدرج بحومه والجناحين فله
حمد عبدالله الوايلي - حوطة سدير
يا محلا المقناص وقت البرادي
في خايع توه من الوسم ممطور
والطير حر وضاريا للهدادي
أشقر اليا شاف الملابيد مسطور
عقلا خزن الخمشي - تبوك
خذها وكالة بالنيابة على الصيد
خذ حقنا ياطير عام وعامين
وبعامنا الرابع ترى نلغي القيد
ولصيدنا نرجع وبالحيل شفقين
عبدالكريم النغيمشي - الربيعة
يا صقر ياللي فوق هام السحابه
تفرد جناحك يا حسين الوصوفي
منهو تصيده حيل يشكي عذابه
ياالنادر اللي زان فيك الحروفي
بشائر القحطاني - الرياض
نرحب بمشاركاتكم الشعرية حتى مساء الاثنين على الفاكس رقم
4871070أو الإيميل الخاص بصفحة الخزامى: khozama@alriyadh.com زاوية: (صوت الصورة).. ويا هلا
صورة العدد السابق