صوت الصورة

صورة العدد
الخيل وسط اليم والموج حاديه
احذر تمادى فالبحور العميقه
وشد الرسن بالحيل خلك تباريه
مادري خيال الوضع والا حقيقه
ليت السواحل والخفاره تناديه
وتنقذك يالفارس وقبل الغريقه
عبدالمحسن محمد المحيسن - رياض الخبراء
الخيل ماهي للبحر وانتفاعه
الخيل حره ماتبي غير ميدان
والجاهل اللي ما يطيع استماعه
يروح فيها مامعه سرج وعنان
احذر من امواج البحر وارتفاعه
تراك مخطي واضحٍ شوف الاعيان
خلك مع اليابس كثير اتساعه
يعطيك للمهره مجالٍ وميزان
حمد عبدالله الوايلي - حوطة سدير
الموج الأزرق يعشقه كل سباح
لا صار في فن السباحة خبيري
يا كم عاشقٍ له أبريق الهوا فاح
يلقى به السجه وراحة ضميري
حتى البهايم عندها عشق وكفاح
وأكبر دليل الخيل وشوف البعيري
خالد ناصر المخيمر - روضة سدير
اقول ان الخطر حولك ترفق لاتروح بعيد
تراك انت قريب ما خفاك ان البحر غدار
نفوس روحت وسط البحر واهمال بالتحديد
خذ حصانك نصيحه نفوسٍ تنتظر بالدار
رساله جتك يابن الناس وخذها والخطر لاتعيد
ترى درب السلامة مطلب وافهم ولاتحتار
محمد عبدالعزيز الخنيفر - أشيقر
هذا البحر لو كنت سبّاح غدّار
حتى ولو مليان لولو ومرجان
في غبّته تكمن حواديث وأسرار
مع عاتيات الموج وشرور حيتان
وبين الحصان وفارسه ولف مقدار
وسط البحر وسط السهل وين ماكان
والبحر له سكّانة المدن تختار
والبر له راع المعاميل شفقان
سعود عائش الحربي - جدة
ماهيب تسبح فالبحر مهرة الخيل
حوافره بالقاع تعوق ممشاه
وان كان عمقه واصل لكاهل الشيل
ياليل يا طولك على حر بلواه
الخيل ماله فالبحر من مداخيل
ركضه على اليابس محدٍ تعداه
مذكور فالقرآن في خير تنزيل
كم من صحابي فالحرايب تعلواه
سعود عبدالعزيز الهزاع - نعام
ياللي دخلت البحر
هذا خطر يالفهيم
فعلك ترى به خطر
أقول ما هو سليم
وترى فلا لك عذر
هذي فعول الغشيم
لا تروح روحك هدر
وأنت لنفسك خصيم
ريان محمد الخنيفر - الرياض
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق