صوت الصورة

طافش مادام العمر توه صغيري
وخلك على الاطراف من حول مقضاب
من علّم الاطفال علمٍ .. يصيري
ما ينفع التعليم في شخص لا شاب
سعد الحمّاد – روضة سدير
يا معلمين أطفالكم للسباحه
في ديننا هي والرمايه مع الخيل
لكن هدفكم ضامنينٍ نجاحه
لمسابقات الما لكم خير تمثيل
فهد بن عقيل الطويان - بريدة
المسبح اللي للوارعين مصنوع
ومعرضينٍ للخطر ما بها شك
اللي جعل طفلك على المي مرفوع
بقدرة الله رافعينه بلستك
علي رشيد الرشيد - رياض الخبراء
المسبح اللي طبحو فيه الأطفال
كلٍ يطافش والفرح في عيونه
الحر كايد واللظا يشوي الحال
وزود الحرارة دائماً يذكرونه
خالد بن ناصر المخيمر - روضة سدير
كل المسابح خطر يا ناس
يا كم من واحداً ماتي
الطفل يغرق وهم جلاس
ولا عاد تنفعهم الآهاتي
عبدالكريم عبدالرحمن السلوم - القرائن
فن السباحه أمر مطلوب وإبداع
يوصي بها الإسلام لا تبتعدها
شوف اللواتي من ورى هاك الاصقاع
كلٍ تدرب طفلها من وحدها
علي جابر الفيفي - بيشة
العوم مطلب للصغير وكبيري
يا ما يجي له يوم وانتم تعرفون
عندك مجالٍ والزمن يستديري
الوقت قدمك لا يجي عندك ضنون
ريان محمد الخنيفر - الرياض
هذي المسابح آمنه للبزارين
إن كانها صبات أو نفخ بالون
عمقه على الأطفال لاسنتي خمسين
عبّه ونم خل الفلذات يلهون
سعود بن عبدالعزيز الهزاع - نعام
الشرق بالتدريب يرسم للأهداف
يدربون الطفل لو كان له شهر
ولامن تعلّم ابتدأ الطفل ما يخاف
وإلى كبر يزاحم الموج بالبحر
عبدالكريم إبراهيم بن خزيّم - البكيرية
إصغار باحلامهم اكبار
لازم ينالوا بطولاتي
ودهم يصفوا مع الشطار
بالجد تنهى المهماتي
عبدالمحسن محمد الجريسي – الرياض
الصيف حار والاجازه سعيده
وكلٍ على الوجهه يجهّز ركابه
وزين المواقف يا الله انك تعيده
اصغار تلهو والمواقف دعابه
حمد بن عبدالله الوايلي - حوطة سدير
وش حاجة اللي واقفينٍ على السور
أطفال تسبح يا ملا وش بلاكم
روحوا تمشوا اتركو الطفل مسرور
ما همّه الا بشي عنه يحداكم
عبدالكريم الرسلاني - الرياض
ياللي بوسط الما رميتوا بالاطفال
تبونهم يتعلمون السباحه
حذرا من التفريط حذرا من الاهمال
ثم يتحول ضحككم ذا مناحه
سعد الجبيري - القويعية
طفل في سن الرضاعه ومعه غيره يسبحون
في بلاد الشرق ناس يصنعون المنجزات
كيف بالله اتركوهم يغطسون ويلعبون
كيف بالله هالجراءه في قلوب الامهات
سعد مويزر البدراني – الرس
هذي بطولة غطس .. والا سباحه
والا على التدريب زادوا مهاره
فراخة البطه خذوا كل راحه
كلٍ معه امه تسوقه بطاره
عبدالكريم النغيمشي – الربيعية
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية (صوت الصورة)
ونرحب بالصور الهادفة والطريفة .. ويا هلا
صورة العدد