عواكيس

* العزيز معوكس هل صحيح أن نسيب بيرت مارفيك يعمل معه في المنتخب ويدرب في أحد أندية هولندا.. ياخي وش ذا الواسطة عن الهولنديين؟.
راشد الدوسري- الدمام
* متوزعين صح واحد يحلل في الاستوديو وأبونسب يدرب في هولندا!
* ممكن تفك لنا اللغز يابو العواكيس هالحين فيه صحف تقول حسين عبدالغني تلاسن مع عوض خميس وصحف ثانية تقول تشابك.. وش الصح طال عمرك هات العلم؟
حمود الدهمشي- عرعر
* قبله تلاسن وتشابك وتصادم مع الفريدي وهوساوي والحقباني ودقوا على نجم.
* الناقد الكبير معوكس ماودك تدرب نادينا الطائي عساه يعود إلى «دوري جميل» ويستعيد ذكريات عيال الدعيع والصقري وبقية نجوم الجيل الرائع؟
سعد العنزي- حائل
* ناديكم شكله راح فيها لو يدربه مورينهو فاله دوري الجموس.
* الحبيب ابو العواكيس ممكن تفسر لي اقالة المدربين واعادتهم مرة أخرى.. ياخي إذا تبيه ليش تقيله من الأساس شرط جزائي ومقدم عقد جديد؟
فهد عوض- جدة
* ابدا هذي البربسة بعينها وعلمها ومالقاها الا المدرب مقدم وعقد جديد والراتب دبل كيك.
* العزيز معوكس بشر عسى الهلاليين لقوا مدرب، ترى لك عندي بشارة تذكرة إلى رومانيا ومنها إلى أمستردام؟
خالد الرشيد- الرياض
* ما لقوا ولا عندهم نية.
* الكاتب الرياضي المرموق معوكس.. من تتوقع يفوز برئاسة اتحاد الكرة عادل عزت وإلا شخص آخر؟.. صراحة نبي التجديد، ونبي اتحاد قوي ماتخوفه التهديدات والانذارات ويبتعد عن الذات العام؟
يوسف الحبيب - تبروك
* فيه ناس مايبون اتحاد قوي ما يخوفه الأنذار الأخير!
* استاذي ابو العواكيس ليش جمهور الهلال مستعجل وعاطفي، والدليل انتقاده للياقة اللاعبين وتأخر شفاء المصابين؟.. انت عارف أن في العجلة الندامة ولابد من التكتكة والوقت الطويل حتى يجي الشغل مضبوط؟
سعود الفهد- المدينة المنورة
* ما أطول من الصيف و»كنك يا بو زيد ما غزيت» وعسكرت في النمسا !
*الناقد الساخر معوكس هناك من غرد في التويتر واشار الى ان حسين عبدالغني يلعب بالمجان وانه بعد مسلف بعض الناس ما صحة هذه التغريدة؟
احمد الحمد - بريدة
* ما ادري لكن الوضع الحالي يقول يا قربها.
*صاحب المليون رسالة ابو العواكيس لا يفوتك واحد يقولون عنه « متملق « يتهكم بالحضور الجماهيري قبل بداية مباراته مع المنتخب الاسترالي.. هذا وش تصنفه؟
نادر الحساوي- الدمام
* ما يحتاج انت قلتها «متملق» وازيد عليها ما يعرف العيب.
*قاهرهم وحابس دمهم معوكس اشوف بعض المشجعين والاعلاميين خفوا هجوم على المنافس ولا عاد يذكرون اسمه تتوقع اعقلوا ولا وش القصة؟
عبدالعزيز السعد - حي الشفاء
-لا بالله ما اعقلوا ولا عندهم نيه مشغولين بمضاربات الكابتن.
*هلا معوكس ومية هلا يا خفيف الظل أبو دم خفيف وشربات هل تجهزت لفصل الشتاء وبرده القارس؟
خليف العنزي- حفر الباطن
* تجهزت بالفروة 2016!
* استاذ معوكس بعد التحية والسلام لشخصك الكريم الغالي على اصدقائه الذين ينتظرون اطلالته كل سبت سؤالي هل تؤيد التمديد لا تحاد الكرة أم لك راي آخر؟
سالم الحربي-بريدة
-ابدا يكفيهم التمديد لرخص القيادة واشتراك النت وتمرير الرخص الآسيوية.
*العزيز معوكس بعد التقدير والمحبة كيف طافت على اصحاب الشأن ترشيح ابن أخ نائب رئيس اللجنة ورسوب ابن رئيس اللجنة الأخرى
ماهر عبدالله - رأس تنورة
* اصحاب الشأن فالينها في الفندق ما دروا عن أحد!
*السيد معوكس من خلال خبرتك هل لديك فكرة عن طريقة مدرب المنتخب مارفيك في اختيار عناصر «الأخضر» وكيف يقيم المستوى وهو بعيد يحلل الدوري الانجليزي في هولندا؟
عبدالله العتيبي - الرياض
* قص للتشكيلة السابقة ولزق والله يستر لا يغلط ونشوف المنتخب الانجليزي!
مع تحيات معوكس وسلامتكم
للتواصل مع زاوية عواكيس
بريد الكتروني sport@alriyadh.com
فاكس 4871070