بلادنا اللي محكمة ٍ شعايرها

كبر و صلى و شال الروح و اعطاها
يمة سهيل اليمن وجّه و عبرها
شيهانة ٍ فوقها صقر ٍ تولاها
الراس يطبخ و هي تطبخ مواخرها
خضراً يعزز شعار العز معناها
شعار دار الحرمين و منابرها
دار ٍ رسول الهداية شرب من ماها
جته الرساله براضيها و صدرها
صلاة ربي و تسليمي على طاها
على النبي و آله و صحبه نكررها
لبيه يا احمد و دار الحق لباها
و لبيه ياللي عيالك رهن وامرها
ابو السعودي و ابو العرب و قراياها
العرب و اديارها لا قام دبرها
اخو فهد مصدر الدعوى و ملفاها
لا وصلت الراس الاكبر ما تعذرها
سلمان لا طالت الهامات وطاها
كبود سعد ٍ لها و كبود يسمرها
سلمان لا كبرت القاله تلقاها
بسياسة العود يذرعها و يشبرها
امجاد ابوه انتهض سلمان و احياها
و ناس ٍ نست فعله الاول يذكرها
صيحة عدن يوم اخو نوره توحاها
والمّ لها فزعة ٍ ماهوب يذخرها
صقور جوه تدك اعداه و اعداها
و اسوده اللي على ارضه من يناحرها
عصف ٍ بحزم ٍ على عفاش سقناها
و احوثته اللي بامر طهران ناصرها
كرامة العام ما كنه تعشاها
و شعوب داره محيمرة ٍ نواظرها
فضيحة الجلده السودا سترناها
و قلنا يمين ٍ تبي عفاش نقصرها
و اثره مثل طير ابن برمان درباها
جاء مقترش حية رقطاء و زبرها
ما يدري انا جنود الدار و حماها
هذي ديار الجدود و ذي مقابرها
يبطي و تبطي مجوس الفرس تدهاها
النصر بالله و هي نكسر مناخرها
( ذي قار ) باقي صداها ما نسيناها
يا ما اشبه البارحه من وجه حاضرها
هرمز زهد بالظنون اللي تهقواها
و جيوش هامرز كثرنا مجازرها
احفاد من جت و جابت تاج كسراها
و أبناء عمر سمها القاتل و قاهرها
و اذا عمر روحه الباري توفاها
الله خلقنا عمر و الروس نظهرها
مكة و طيبة عساهم من فداياها
و بلادنا اللي محكمة ٍ شعايرها
اهل الجبانه تهان و تحلق الحاها
و اهل الظفر ما تهاون في مفاخرها
فراج ابو لسان السبيعي