اللغز

كتبه الاسبوع الماضي الشاعر فهد علي الحصين الحربي من القصيم ويقول :
ياويش بنت ونسبوها لرجال
واللي نسبت له فيه قو وجلادي
ترى شبيه البنت بالطقس ينقال
والا شبيه الرجل وسط النوادي
والحلول شعرا :
لغز جميل وحله اليوم ماطال
نبي نشارك ربعنا با لوكادي
الحل عاصفة الحزم مابها جدال
هذي هي الرمعه وعساه المرادي
فزاع عبدالله الشمري - حائل
يا مرحبا بك يا فهد عد الاجيال
واعداد سكان المدن والبوادي
حلي تراه العاصفة مابه اجدال
عاصفة للحزم ضد الاعادي
علي رشيد الرشيد -رياض الخبراء
يا مرحبا واللغز له كم حلال
وانا عرفت الحل علم وكادي
العاصفة والحزم يا طيب الفال
ويشكر رجال بالجريده وعادي
محمد ابودحيم-البدائع
يابو علي لغزك مجود بالاقفال
والحل قلنا العاصفه ذا وكادي
ذي عاصفة الحزم من عرض من قال
حنا العناد انصارفيها عنادي
سعد صنهات السهلي - الدرعية
يا صاحبي واللغز دايم على البال
والحل للكل صار معناه بادي
عاصفة حزم (ن) لها قدر واجلال
ضد الذي عن سكة الرشد غادي
سعود عائش التميمي الحربي - جدة
يا وافي المعدن وياطيب الفال
البنت فيها اهل الحضر والبوادي
العاصفه بالحزم لا شك لا جدال
تلقى خبرها بالصحف والروادي
علي الزولاني الفيفي - بيشة
لغز الاسبوع
يكتبه للصفحة الشاعر سعد صنهات السهلي من الدرعية ويقول:
ويش الحلال اللي حرامن تذوقه
ممنوع ن اكله قلت وشلون ينذاق
ياويل من ياِكله والله فوقه
من يا ِكله في داخله يحرق احراق
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار احدى الزاوتين.