لا واهني اللي رصيده ملايين

من قصائد الأمس

لا واهني اللي رصيده ملايين
وامضاه في راس القلم يقلبونه
وبواخره تمشي بكل البلادين
ومصادره من كل شكل نمونه
وعنده عيال صالحين ورشيدين
لا غاب والدهم هم يمثلونه
بيته يعانق شاهقات الضلاعين
تلقى الحمام مبيض في ركونه
وديوانه أكبر ما بنى بالدواوين
مفتوح واجواد العرب يدلونه
فيه الخدم متكاملين ومطيعين
من جاء لهديوان بيبا شرونه
ولا صار الريضان مثل البساتين
ما طاب من ريضانها ينزلونه
تلقى الخزاما والنفل و الرياحين
تطرب له الورقة وتزعج فنونه
مع لابة تنطح وجيه الشياطين
عز لهم وهم يتفادون دونه
لا خطب بنت ما هلها معيين
الناس كلهم ودهم يناسبونه
هذي الحياة اللي لها الناس شفقين
من غر منها يا حياة المهونه
أشوى من اللي ياخذ الدين بالدين
وطلابته راس الشهر يبلشونه
ومع الفقر عنده ابزور ونساوين
يبون حاجتهم ولا يعذرونه
يقضي معاشه ما مضى الشهر يومين
الفقر شيبه وشيب عيونه
عايش ولكن عيشة الفقر مسكين
كنه مصخن وهو ما به اصخونه
يا الله يا قابل صلاة المصلين
ان تقوم بعونا ثم عونه
سليمان الهويدي