صوت الصورة

اللي على جيبٍ مشى يعبر البر
مشتاق ساق الساق حمّل ذبيحه
لأرضٍ سقاها مزن وسمٍ تزبّر
والقفر عشبه تنعش الروح ريحه
ربيع وعطره فاح مسكٍ .. وعنبر
طب القلوب وكل نفسٍ جريحه
محمد إبراهيم الفهيد - الزلفي
عزّاه ياللي على التندّه
مرتز رايق وهو مغدور
شالوه معهم هل العدّه
يبغون لحمه شوي وقدور
بس يتلذّع .. ومن قدّه
وراه شلفا معه ساطور
لحظات يا صاحبي عدّه
مرحوم يا صاحبي ماجور
عبدالكريم النغيمشي - لوذة
رفيقنا اليوم وش عنده؟
يا مجهّز الجيب كشّاتي
رابط خروفك على التنده
ومعك الذبيحه ولد شاتي
اخاف انا الكبش ما عنده
يطب من فوق ينحاشي
عبدالعزيز الصالح - القصب
ياما حلا المكشات لاصرت ناوي
وخوّة نشاما ما بهم من جحدها
والكبش راكب فوق لاويه لاوى
لكن على ما قيل للموت قِدها
خليف فهيد الحربي - الرياض
في كلِّ حيٍّ يمكنك تكسب الأجر
قد قالها الْخَاتم عليه السلامي
اقرأ تعاليم أحمد بسنة النَّحر
تنبيك عن دين الهدَى للأنامي
بعض الخطأ لاصار ماينفع العذر
ولا عاد يجدي فيه كثر الملامي
يامن خرجت البر تبغى سعة صدر
الله يجعل رحلتك للتمامي
ناصر جمعان آل عوض - وادي الدواسر
القلب لا شاف المكاشيت يشتان
وأكثر طراة البر عقب المسيله
البر يا زينه .. وقته ترى حان
في روضةٍ تحتاج وصف ودليله
هذا محمّل له خروفٍ بنيسان
ومعه الحطب من فوق تنده يشيله
ونشب نار .. ونركي دلال رسلان
وتصفي كبودٍ من غثاها عليله
عثمان إبراهيم الوشيد - الرياض
زانت بلادي .. وامتلت بالغداري
ثم ابتدأ المشوار بنصب الخيامي
لا واهني اللي رحل للبراري
بوسط الرياض الخضر يحلو المقامي
محمد عبدالعزيز الخنيفر - أشيقر
ناوين رحلة بر .. والعزم معقود
على الشعيب اللي به السيل حاير
مكشات يم البر ما فيه منقود
سعة صدر تسوى الذهب والعماير
كبسه على نار الحطب جمرها زود
لوجيه الرجال اللي بها الطيب فاير
هذي حلاة البر لا صرت مضهود
لا صار حظّك دايم الوقت باير
خالد ناصر المخيمر - روضة سدير
ياهل الجيب السفاري وقفوا لي
ودّي أسولف .. واقدّم نصيحه
لا بغيت البر والمشي البطولي
اكرب حزامك والرحله مريحه
خلّها فلّه وأشوف أحلى الفصولي
انتبه للحمل حذرا من فضيحه
والطلي خلّه على بالك وحولي
لا تحرّك موترك خطرٍ مطيحه
حمد عبدالله الوايلي - حوطة سدير
محمّلٍ من فوق ذا الشبك نجدي
للي مواعدهم يبيها علامه
عيّا عليهم الغدا قال عندي
فطورهم بشواه يطبخ ايدامه
وجبة غدا سوه على نار مندي
ولا ينحرق بالنّار تظهر عظامه
سعود عبدالعزيز الهزاع - نعام
حط الذبيحه بحوض الجيب
أكبر غلط حطها فوقه
ترى المخالف حرام .. وعيب
يا قع بعيبه .. وعذروبه
ولاتبني البيت بشعيب
ولاتطلق الطير بسبوقه
زبن مقبل العنزي - بريدة
طق خيامك يا رفيق الخير طقه
مع ربوعك والسعد وسط الربيعي
ولأجل ربوعي ما أفكر بالمشقه
كم يزين الجو والخاطر وسيعي
ومن يزورك لازمٍ تعطيه حقه
تذبح الخرفان من بعض القطيعي
ريان محمد الخنيفر
الصورة اللي بالجريده جميله
وسط الخزامى شكلها يعجب العين
جيبٍ ليا حمّل بحملٍ يشيله
يصبر ليا حمّل على العسر واللين
مع عزبةٍ من كل نوعٍ ثقيله
براً وخيمه .. والطلي .. والمواعين
في وسط جواً نابتٍ عقب سيله
تلقى الحباري فيه وحده .. وثنتين
سعود مطرب العتيبي - الدوادمي
يا ونّتي ونّت اللي فوق
لفح الهوا دمّع اعيونه
الجو ماطر .. وفيه ابروق
والجيب والم تشوفونه
يا راعي الجيب يا مطفوق
طليّكم .. لا تخلونه
عبدالكريم عبدالرحمن السلوم - القرائن
الجيب فوقه كبش للبر مجيوب
وكان الاصح الوضع في أوسط الجيب
وسجّت الرجلين لا ضقت مرغوب
في صحيحٍ ريح الهوى به كما الطيب
واختار رفقة كل شهمٍ .. ومحبوب
وشبّ نارك .. شاكراً عالم الغيب
سعود عائش الحربي - القاهرة
شان البهايم يالسنافي عظيمي
ارفقا على الانعام يا طير حوران
اذكر مجر الكبش وقتٍ قديمي
نزل من الرحمن فادي له انسان
بدر الحزيمي
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق