صوت الصورة

ياللي على السيكل شعلت أم قرنين
وحطيتها بالخرج فوق العمودي
وين أنت رايح يا حبيبي على وين؟
للبر .. ولا يم كسب النقودي
ذي عارضيه شكلها يخزي العين
يا رب تسلم من سهام الحسودي
خالد بن ناصر المخيمر – روضة سدير
هذا ضرر على البهايم وغلطان
يالآدمي فعلك عليها ترى جور
شف لك طريقٍ غيرها قلت يا فلان
لا هيب تشكي وأنت منتاب ما جور
الرفق واجب منك يا باغي إحسان
واللي على هالحال ماهوب معذور
محمد بن عبدالعزيز الخنيفر - أشيقر
بالهون يا راعي السيكل
لا يحوص ثم تذبح الخروف
وان حاصبك تعدم الهيكل
ويزيد سو الضروف ضروف
غازي قاعد العتيبي - الدوادمي
صورة العدد السابق
حطيتني يا صاحبي وسط كيسي
واحكمت ربطي فوق سيكل ودراج
كني سجين فوق راسي بوليسي
راحت حياتي بين بايع وحراج
عبدالمحسن بن محمد المحيسن - رياض الخبراء
سيكل يشيل التيس قاعد ومرتاح
ملفوف مستانس موجه على السوق
يبغى يبيعه مطلبه جلب الأرباح
دام التيوس اليوم أسعارها فوق
عبدالكريم بن خزيم - البكيرية
يقولون الاختراع ابن الحاجه
واضحه ما تحتاج لها نواميس
شف هذا ويش مسوي بالدراجه
ما لقا غيرها يحمل التيس
محمد سعد الجروي - الرياض
صورة خروف مطربلٍ فوق سيكل
ما هو صحيح ان الطلي حيّ ما مات
ولو افترضنا ان الطلي عظام هيكل
وشلون بيدرج ويقطع مسافات
سعود عبدالعزيز الهزاع - نعام
فكّر وبرّق واكتشف له وسيله
ينسى التعب بالدرب معها ويرتاح
لاصار يقطعها مسافه طويله
ماهوب ناقص زود من فوقها صياح
عبدالله بن عبود السهلي - تبوك
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة
ويا مرحبا بالجميع..