ليش ما أبكيك؟!

ما عندي أغلى منك يا دمع عيني
أصخت بي الأيام وأزريت لا أصخيك
مكنون في عيني بقيّة سنيني
لا يوم تكفيني، ولا يوم يكفيك
تستاهل أبخل فيك عمّا يجيني
سبحان مجري الفلك، وشلون يجريك؟!
قل لأول الغالين لا يبتليني
دمعي وعيني يا أول إنسان تفديك!!
والشعر لوهو خاتم ٍ في يميني
رثيت له بالحال وشلون يرثيك؟!
غير الفراق اللي يقطّع وتيني
تجري رياحه بين قلبي وطاريك
أقفيت ماكني أبيك وتبيني
أقفيت ما ردّيت صوت لمناديك
ما كن شيءٍ مات بينك وبيني
في كل صبح ٍ داعي الشوق يدعيك
أنت الوحيد اللي مثل والديني
ودوّر على واحد سواهم يساويك!
كل السنين المقبله تحتريني
لو ذكرتني فيك مانيب ناسيك
لوّ الشَعَر ينبت براحة يديني
ما عاد يمديني ولا عاد يمديك
حزني عليك أكبر من دموع عيني
هذا السبب لا قلت لي ليش ما أبكيك؟!